Лінкі ўнівэрсальнага доступу

На Ціханоўскую і BYPOL завялі крымінальную справу «за падрыхтоўку акту тэрарызму»


Генпракуратура абвінаваціла Сьвятлану Ціханоўскую ў «падрыхтоўцы тэракту»

Генэральная пракуратура Беларусі пачала крымінальную справу за падрыхтоўку акту тэрарызму.

Пра гэта журналістам дзяржаўных СМІ паведаміў генэральны пракурор Андрэй Швед.

«Генпракуратура на падставе матэрыялаў Камітэту дзяржбясьпекі і МУС распачала ў дачыненьні да Ціханоўскай і ўдзельнікаў так званай ініцыятывы BYPOL крымінальную справу за падрыхтоўку акту тэрарызму арганізаванай групай паводле арт. 289 Крымінальнага кодэксу. Названыя асобы спрабавалі ўчыніць выбухі і падпалы ў сталіцы і іншых гарадах. Затрыманы з доказамі злачынства грамадзянін Маляйчук ужо даў паказаньні пра арганізатараў тэракту», — заявіў ён.

З матэрыялаў праверкі нібыта вынікае, што ў пляны арганізатараў уваходзіла абвінаваціць прадстаўнікоў органаў дзяржаўнай улады ў гібелі людзей.

Прэс-служба Сьвятланы Ціханоўскай пракамэнтавала «Медиазоне» навіну пра крымінальную справу каротка:

«Проста з жартаў пра Ніка і Майка больш ніхто не сьмяецца, дык Генпракуратура прапануе новы мэм».

Днямі МУС Беларусі заявіла, што ў Печах пад Барысавам апэратыўнікі ГУБАЗіК затрымалі 35-гадовага жыхара Пінскага раёну, які нібыта рыхтаваў два тэрарыстычныя акты — у мясцовай вайсковай частцы і ў Менску. Там дадалі, што «сьляды вядуць у BYPOL», зь якой затрыманы падтрымліваў шчыльную сувязь.

У сваю чаргу, ініцыятыва былых беларускіх сілавікоў назвала заяву МУС «абсурднай», бо яшчэ 24 сакавіка яны атрымалі інфармацыю аб падрыхтоўцы ўладамі тэракту, які дазволіць абгрунтаваць увядзеньне надзвычайнага становішча.

Паводле ініцыятывы, 25 сакавіка ў рамках пляну дыскрэдытацыі пратэставага руху Камітэт дзяржбясьпекі рыхтаваў тэракт у адным з будынкаў органаў унутраных спраў.

Хто такая Сьвятлана Ціханоўская

Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.

  • 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, лідэра кампаніі «Страна для жизни» блогера Сяргея Ціханоўскага, які знаходзіўся ў зьняволеньні, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
  • Кандыдатам у прэзыдэнты Ціханоўскую зарэгістравалі 14 ліпеня.
  • Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся са штабам Сьвятланы Ціханоўскай і правялі пасьпяховую выбарчую кампанію са шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
  • Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК для таго, каб іх абскардзіць.
  • З ЦВК палітык не вярнулася. Зь ёй зьнікла сувязь, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом. Абставіны і ўмовы свайго ад’езду зь Беларусі Ціханоўская дагэтуль не разгалошвае і тлумачыць гэта меркаваньнямі бясьпекі.
  • Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
  • 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
  • 10 верасьня Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
  • На працягу верасьня 2020 году шэраг замежных краін, у тым ліку ЗША, Канада, Вялікабрытанія, Нямеччына, Данія, Швэцыя, Польшча, Чэхія, Літва, Латвія, Эстонія, заявілі, што не прызнаюць Аляксандра Лукашэнку легітымным лідэрам Беларусі. У гэтых умовах увага сусьветных палітыкаў усё больш перамяшчаецца да Сьвятланы Ціханоўскай.
  • Зь верасьня 2020 года Ціханоўская наведала з працоўнымі візытамі 15 краін і правяла перамовы з 24 прадстаўнікамі ўрадаў розных дзяржаў. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, вярхоўны прадстаўнік ЭЗ Жузэп Бурэль ды інш.
  • Ціханоўская выступае за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікае міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG