Лінкі ўнівэрсальнага доступу

За раскіданыя самарэзы жыхарак Менску асудзілі на пазбаўленьне волі і «хатнюю хімію»


Ілюстрацыйнае фота

Самарэзы раскідалі каля пракуратуры. Аўтамабіль напароўся на іх, прабіў два колы, шкоду ацанілі ў 36 рублёў 18 капеек.

Судзьдзя Юлія Блізьнюк у судзе Фрунзэнскага раёну Менску 3 сакавіка агучыла прысуд у справе аб 45 самарэзах, раскіданых каля менскай пракуратуры 13 сьнежня мінулага году, перадае Праваабарончы цэнтар «Вясна».

Анастасіі Нікіцінай прысудзілі 1 год і 1 месяц пазбаўленьня волі ў калёніі агульнага рэжыму, а Сьвятлане Лабунскай — паўтара года абмежаваньня волі без накіраваньня ва ўстанову адкрытага тыпу («хатняя хімія»). Іх прызналі вінаватымі ў «злосным хуліганстве» (ч.2 арт.339 КК РБ) і «спробе злачынства» (ч.1 арт.14 КК РБ).

Жанчынам па 40 гадоў. Нікіціна — грамадзянка Расейскай Фэдэрацыі, мае двух непаўналетніх дзяцей і брала яшчэ аднаго на патранажнае выхаваньне ў Бараўлянах. У яе дыябэт, праблемы са шчытавіцай, ёй патрэбна апэрацыя на вачах. Пра Лабунскую паведамлялася, што яна начальніца аддзелу «Белгазпрамбанку». Лабунская з 30 сьнежня была пад хатнім арыштам, Нікіціна — у няволі.

Паводле Сьледчага камітэту, жанчыны раскідалі самарэзы «з мэтай пашкоджаньня аўтамабіляў, якія выяжджаюць». Быў прынамсі адзін пацярпелы Клінцэвіч, аўтамабіль якога прабіў два колы, шкоду ацанілі ў 36 рублёў 18 капеек. СК сьцьвярджае, што жанчыны мелі намер паўтарыць раскідваньне самарэзаў 27 сьнежня, але «не давялі намер да канца», бо іх затрымалі на месцы здарэньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG