Для выдачы экспрэс-візаў створаць адмысловы аддзел у Міністэрстве замежных спраў Польшчы, паведамляе газэта Rzeczpospolita. Супрацоўнікі гэтага аддзелу атрымаюць такія ж інструмэнты для выдачы візаў, што і консулы.
На думку польскага ўраду, гэта дазволіць максымальна спрасьціць працэдуру легалізацыі знаходжаньня на тэрыторыі Польшчы многіх беларусаў. Зьмены будуць тычыцца як турыстычных, так і працоўных візаў. У найбліжэйшы час у Польшчы апублікуюць пастанову зь неабходнымі для экспрэс-візы ўмовамі.
Як заявіў прэс-сакратар малога і сярэдняга бізнэсу Польшчы Адам Абрамовіч, польскія прадпрымальнікі даўно зьвярталіся да Міністэрства замежных спраў з просьбай зьменшыць тэрміны разгляду візавых заяваў. Працадаўцы, у арганізацыях якіх працуюць беларусы, нярэдка наракалі на тыдні і нават месяцы, цягам якіх вырашаліся візавыя пытаньні.
