Беларусы Швайцарыі выйшлі на акцыю салідарнасьці і падпісалі паштоўкі палітвязьням
3 кастрычніка адбылася сёмая па ліку ў Швайцарыі і трэцяя ў Бэрне акцыя салідарнасьці зь беларускім народам. Да яе далучыліся каля паўсотні ўдзельнікаў. Акцыя ладзілася на вакзальнай плошчы, многія швайцарцы і госьці змаглі яе пабачыць на ўласныя вочы.
У Менску зноў спэцтэхніка МУС і Міністэрства абароны
Усе апошнія нядзелі, калі адбываліся маршы пратэсту, на вуліцы Менска выводзілі спэцыяльную тэхніку, АМАП і войска. Сёньня ў горадзе назіраецца такая ж абстаноўка.
Чытач зь Менску перадае, што «з боку Ўручча ў кірунку Лебядзінага рухаліся дзьве калёны тэхнікі: у першай — аўтазакі, пяць вадамётаў, 5–7 БТРаў і аўтобусы зь сілавікамі, у другой — каля 8 БТРаў». Паведамляюць таксама, што сілавікі ачапілі Стэлу, шмат вайсковай тэхнікі бачылі на праспэкце Пераможцаў.
4 кастрычніка ў Мазыры
Гандлёвыя цэнтры ў Менску ў раёне патэнцыйных пратэстаў зноў зачыненыя
Сёньня ў цэнтры Менску не працуюць некаторыя гандлёвыя цэнтры і ўстановы, паведамляе @onlinerby. Зачынены гандлёвы дом «На Нямізе», адкрыецца толькі пасьля 16:00. Цэнтры «Сталіца» і «Карона Замак» таксама не працуюць, але паведамленьняў аб гэтым няма ні на сайце, ні ў сацсетках. Жыхары Менску паведамляюць, што KFC і Burger King на Нямізе таксама сёньня зачыненыя.
Гэтак было і ў мінулую нядзелю. Раней дэманстранты хаваліся ад сілавікоў у гандлёвых цэнтрах.
У Гомелі затрымалі яшчэ адну супрацоўніцу сайту «Сильные новости»
Як піша заснавальнік выданьня Пятро Кузьняцоў, затрыманая відэакарэспандэнтка сайту «Сильные новости» Надзея Пужынская. Яна цяпер у Савецкім РУУС. Паводле якога артыкулу вінавацяць раней затрыманых галоўную рэдактарку Ганну Якштас і яе мужа, карэспандэнта Дзяніса Якштаса, па-ранейшаму невядома. Яны ўжо дзень за кратамі, чакаюць суду ў панядзелак. Іхныя дзеці ў саякоў.
«Беларусы хочуць жыць на волі, а не ў турме», — Сьвятлана Ціханоўская
Сьвятлана Ціханоўская зьвярнулася да ўдзельнікаў маршу 4 кастрычніка ў падтрымку палітвязьняў.
«Сэрца беларускага народу зноў разьбітае. Памёр яшчэ адзін чалавек: мэдыкі дыягнаставалі ў Дзяніса Кузьняцова, дастаўленага з Акрэсьціна, пераломы касьцей чэрапа, адкрытую траўму галавы, гематомы, пераломы рэбраў, удар лёгкага. Супрацоўнікі ізалятара кажуць: ён „зваліўся з нараў“.
Страшна, што людзі гінуць, што іх забіваюць у катавальнях. Страшна, што іх сьмерць прыкрываюць відавочнай хлусьнёй. Страшна, што ў турмах знаходзіцца велізарная колькасьць людзей, кінутых туды за тое, што асьмеліліся змагацца за свабоду»,-- заявіла Ціханоўская.
4 кастрычніка ў Сьмілавічах
4 кастрычніка ў цэнтры Менску
Першыя затрыманьні ў Менску
На праспэкце Пераможцаў у Менску заўважылі першае затрыманьне. «Белсат» перадае, што ў раёне Нямігі «людзі ў цывільным» затрымалі яшчэ аднаго чалавека.
Цэнтральныя станцыі мэтро ў Менску зачыненыя
У Менску зачынілі станцыі мэтро «Плошча Леніна», «Кастрычніцкая», «Плошча Перамогі» і «Плошча Якуба Коласа», перадае чытач. Закрытыя таксама «Няміга», «Фрунзэнская» і «Маладзёжная», перадае «Наша ніва».
Так было і ў папярэднія нядзелі, калі праходзілі маршы пратэсту.
У Віцебску затрымалі Тацяну Севярынец
А 13.40 Тацяна Севярынец выйшла са свайго дому, у двары да яе падышлі невядомыя, прадставіліся супрацоўнікамі Першамайскага РАУС Віцебску — сказалі, што трэба праехаць зь імі ў аддзяленьне, скласьці пратакол, які быў накіраваны да дапрацоўку за ўдзел у акцыі 6 верасьня. Тацяна знаходзіцца ў міліцыі, паведаміла яна Свабодзе.
Сілавікі на праспэкце Пераможцаў у Менску
Тэлеканал «Настоящее время» вядзе жывы эфір з пратэстаў у Беларусі
Традыцыйна ў трансьляцыі бяруць удзел экспэрты, палітыкі і відавочцы падзей.
У Менску абмежаваны мабільны інтэрнэт
У Менску «традыцыйныя» ўжо для нядзелі перабоі з мабільным інтэрнэтам. Апэратар А1 прызнае, што гэта зноў зьвязана з «распараджэньнем упаўнаважаных органаў».
Раней у такіх сытуацыях практычна адсутнічаў доступ праз 4G і 3G, але працаваў праз 2G
У Гомлі перакрыты цэнтар гораду
Ланцугі АМАП і ўнутраных войск стаяць на ўсіх практычна перакрыжаваньнях вуліцы Савецкай. Аўтазакі і сінія мікрааўтобусы стаяць ля ўнівермага "Гомель", на праспэкце Перамогі і на плошчы Леніна. Збор удзельнікаў Маршу меркаваўся на плошчы Леніна.
У Віцебску затрымалі журналістаў
У Віцебску затрымалі «для ўдакладненьня асобы» журналістку Тацяну Мацьвееву і фатографа Алеся Пілецкага. Пра гэта паведаміў іх калега Сяргей Серабро.
У Горадні затрымалі блогера
Горадзенскага блогера і вядоўцу вясельляў Андрэя Ірху затрымалі міліцыянты на Савецкай плошчы ў Горадні падчас стрыму. На плошчы ідзе сельскагаспадарчы кірмаш. Тут знаходзяцца кіраўніцтва міліцыі, прэс-служба УУС. Побач з плошчай шмат міліцэйскага транспарту.
У Менску зьбіраюцца калёны дэманстрантаў
У розных раёнах Менску зьбіраюцца невялікія групы дэманстрантаў. Яны накіроўваюцца ў цэнтар гораду, паведамляе тэлеканал «Белсат». На Нямізе заўважаная група каля сотні чалавек.
Калёны людзей у Менску сьцягваюцца да Нямігі таксама па Старажоўскай, ідуць па дарозе на мосьце празь Сьвіслач на Багдановіча.
Затрыманьні ў Менску ля стэлы
Першыя тысячы дэманстрантаў у Менску
Каля дзьвюх тысяч чалавек са сьцягамі сабраліся на падыходзе да стэлы з боку праспэкту Машэрава. Сам праход да стэлы перакрыты.