Лінкі ўнівэрсальнага доступу

Зяленскі папрасіў Лукашэнку перадаць Украіне «вагнэраўцаў». Лукашэнка заявіў пра гатоўнасьць да супрацы


Прэзыдэнт Украіны Ўладзімір Зяленскі правёў тэлефонную размову з кіраўніком Беларусі Аляксандрам Лукашэнкам.

«Спадзяюся, што падазраваных у тэрарыстычнай дзейнасьці на тэрыторыі Ўкраіны нам перададуць для прыцягненьня да крымінальнай адказнасьці згодна зь дзейнымі міжнародна-прававымі дакумэнтамі», — напісаў Уладзімір Зяленскі ў сваім тэлеграм-канале.

Пазьней у афіцыйным паведамленьні прэсавая служба Ўладзіміра Зяленскага дадала, што кіраўнікі дзяржаў дэталёва абмеркавалі пытаньні, зьвязаныя з затрыманьнем групы асобаў, якія належаць да прыватнай вайсковай кампаніі «Вагнэр».

«Была адзначана важнасьць далейшага эфэктыўнага ўзаемадзеяньня кампэтэнтных органаў дзьвюх краін, у прыватнасьці, у кантэксьце іх перадачы Ўкраіне», — гаворыцца ў паведамленьні прэс-службы прэзыдэнта Ўкраіны.

Лукашэнка заявіў пра гатоўнасьць да супрацы

Паводле прэсавай службы Аляксандра Лукашэнкі, тэлефонная размова з Уладзімірам Зяленскім была прысьвечаная найперш разьвіцьцю двухбаковых адносін, падрыхтоўцы да правядзеньня сёлета ўвосень у Горадні трэцяга Форуму рэгіёнаў Беларусі і Ўкраіны.

«Аляксандар Лукашэнка і Ўладзімір Зяленскі таксама абмеркавалі эпідэміялягічную сытуацыю ў краінах, меры па барацьбе з распаўсюдам каранавірусу, абмяняліся назапашаным у гэтым пляне досьведам. Размова таксама ішла аб узмацненьні памежнага кантролю на беларуска-ўкраінскай мяжы і актывізацыі ўзаемадзеяньня паміж памежнымі ведамствамі», — адзначаецца ў паведамленьні на афіцыйным сайце Лукашэнкі.

Інфармацыю аб просьбе Зяленскага выдаць Украіне «вагнэраўцаў» прэсавая служба Лукашэнкі сфармулявала наступным чынам:

«Уладзімір Зяленскі закрануў у размове пытаньне аб затрыманых у Беларусі баевіках. Ён праінфармаваў, што яны ўдзельнічалі ў баявых дзеяньнях на Данбасе, і ўкраінская пракуратура вядзе расьсьледаваньне па дадзеных фактах. Аляксандар Лукашэнка, у сваю чаргу, адзначыў, што праваахоўныя органы будуць супрацоўнічаць па гэтым пытаньні ў рамках падпісаных з Расеяй і Ўкраінай міжнародных пагадненьняў».

У ноч на 29 ліпеня супрацоўнікі праваахоўных органаў Беларусі затрымалі пад Менскам 32 баевікоў расейскай прыватнай вайсковай кампаніі «Вагнэр». Яшчэ аднаго затрымалі пазьней на поўдні Беларусі. Усе затрыманыя — грамадзяне Расеі, але некаторыя зь іх маюць і ўкраінскі пашпарт.

Паводле ўкраінскага цэнтру «Миротворець», большасьць зь іх датычныя да баявых дзеяньняў на тэрыторыі ўкраінскага Данбасу.

31 ліпеня стала вядома, што Беларусь афіцыйна перадала Ўкраіне сьпіс затрыманых. Праваахоўныя органы і ўлады Ўкраіны зьвярнуліся да Беларусі з просьбай выдаць іх Украіне.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG