Лінкі ўнівэрсальнага доступу

Памёр 29-гадовы Аляксей Сасноўскі, які пацярпеў ад аварыі на заводзе беленай цэлюлёзы ў Сьветлагорску


Завод беленай цэлюлёзы каля Сьветлагорску. Архіўнае фота.

4 жніўня стала вядома, што ў апёкавым цэнтры ў Менску памёр 29-гадовы Аляксей Сасноўскі. Ён 30 ліпеня пацярпеў ад аварыі на заводзе беленай цэлюлёзы ў Сьветлагорску.

У выніку аварыі 30 ліпеня на заводзе пацярпелі двое — зваршчык Аляксей Сасноўскі і сьлесар Аляксандар Арэх. Яны атрымалі апёкі. На верталёце МНС абодвух даставілі ў Рэспубліканскі апёкавы цэнтар у Менску.

«Была нейкая паломка, мой брат — ён зваршчык, і ягоны калега — сьлесар працавалі там. Зрабілі што трэба, і апэратар пачаў запуск. Яны засталіся назіраць — каб усё было ў парадку. Ня ведаю, што там адбылося, але набраўся шчолачны газ, і ён выбухнуў. Брат і сьлесар атрымалі апёкі. Мой брат вельмі моцна пацярпеў», — расказваў раней Свабодзе жыхар Сьветлагорску Андрэй, брат Аляксея.

Афіцыйна паведамлялася, што прарвала трубаправод, а рабочых, якія знаходзіліся побач, абліло тэхналягічнай вадкасьцю з тэмпэратурай +80 градусаў. У Аляксея Сасноўскага было 90% апёкаў цела, у Аляксандра Арэха — да 40%.

Завод беленай цэлюлёзы пабудаваны на Сьветлагорскім цэлюлёзна-кардонным камбінаце за кітайскі крэдыт кітайскімі спэцыялістамі. Ад пачатку будаўніцтва завод суправаджаюць скандалы: няякасны кабэль, аварыі, паломкі, шкодныя выкіды, «дэмарш» кітайцаў, якія кінулі завод і зьехалі, шматлікія скаргі мясцовых на смурод ад заводу.

Што важна ведаць пра завод беленай цэлюлёзы пад Сьветлагорскам

  • У 2012 годзе ў Сьветлагорску сабралі больш за 10 тысячаў подпісаў супраць новага будаўніцтва, але праект быў распачаты.
  • Смурод у Якімавай Слабадзе і Сьветлагорску пачалі адчуваць у лістападзе 2017 году пасьля першых пусканаладачных работ.
  • Кіраўніцтва заводу сьцьвярджала, што выкіды не аказваюць нэгатыўнага ўплыву на здароўе, аднак пасьля дзясяткаў скаргаў ва ўсе структуры ўлады ад мясцовых жыхароў, прызнала, што «газы з кепскім пахам» — мэтыльмэркаптаны. Пусканаладачныя работы былі прыпыненыя.
  • 25 сьнежня 2017 году жыхары вёскі Якімава Слабада выйшлі на пратэст, патрабуючы вырашыць праблему са «сьмярдзючым заводам».
  • 7 ліпеня 2018 году ААТ «Сьветлагорскі цэлюлёзна-кардонны камбінат» пачаў пусканаладачныя працы на вытворчасьці беленай цэлюлёзы. У тэрыторыю санітарна-абарончай зоны не патрапілі дачныя ўчасткі і сельскагаспадарчыя надзелы.
  • 15 верасьня мясцовыя жыхары зноўку выйшлі на пратэст у Сьветлагорску супраць выкідаў з кітайскага заводу.
  • Вытворчасьць беленай цэлюлёзы нясе выкіды мэтыльмэркаптану, які ў вялікіх дозах можа выклікаць сьмерць.
  • За 20 мэтраў ад заводу знаходзяцца парнікі Сьветлагорскай агароднінай фабрыкі, якая не ўключана ў санітарна-абарончую зону.
  • За 350 мэтраў — вёска Якімава Слабада, яе ў ахоўную зону ўключылі.
  • Меркавалася, што новы завод забясьпечыць патрэбы ўнутранага рынку і будзе вырабляць беленую цэлюлёзу на экспарт. Першапачаткова праект ацэньваўся на 700 мільёнаў даляраў. Амаль усе грошы атрыманыя з кітайскага крэдыту. Будаўнікі таксама кітайцы — кампанія САМСE.

Канцэрн «Белляспаперпрам​» запэўнівае, што запуск вытворчасьці беленай цэлюлёзы «знаходзіцца пад кантролем». Пры гэтым у канцэрне адзначаюць, што ў тэрыторыю санітарна-абарончай зоны не патрапілі:

  • тэрыторыі садаводчых таварыстваў і дачных каапэратываў;
  • парнікі і адкрытыя надзелы Сьветлагорскай агароднінай фабрыкі;
  • сядзібная жылая забудова вёскі Якімава Слабада.

«Зноў гэты смурод! Нас ратуе толькі моцны вецер». Пад Сьветлагорскам запускаюць кітайскі завод

У ліпені кіраўніцтва ЦКК абяцала, што будзе праводзіцца рэгулярны маніторынг экалягічнай сытуацыі ў раёне. Цяпер амаль штодзень на сайце Сьветлагорскага ЦКК разьмяшчаецца адпаведная інфармацыя, паводле якой выкіды не перавышаюць усталяваныя экалягічным заканадаўствам нормы (гранічна дапушчальныя канцэнтрацыі).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG