Лінкі ўнівэрсальнага доступу

«Зноў гэты смурод! Нас ратуе толькі моцны вецер». Пад Сьветлагорскам запускаюць кітайскі завод


7 ліпеня пад Сьветлагорскам зноў спрабуюць запусьціць прадпрыемства па вытворчасьці беленай цэлюлёзы. Жыхары вёскі Якімава Слабада ахрысьцілі новы завод «сьмярдзючым» — пры пусканаладачных работах увосень 2017 году навакольле накрыла смуродам. Людзі скардзіліся на шматлікія праблемы са здароўем. Пусканаладачныя работы былі спыненыя. Цяпер — новая спроба. «Зноў гэты смурод! Нас ратуе толькі моцны вецер!» — скардзяцца вяскоўцы.

«Просьба паставіцца з разуменьнем»

Перад пускам заводу Сьветлагорскі цэлюлёзна-кардонны камбінат папрасіў «паважаных жыхароў Сьветлагорску і раёну» паставіцца з разуменьнем да магчымых часовых нязручнасьцяў. (http://www.sckk.by/ru) Дырэкцыя абяцае, што маніторынг за станам навакольнага асяродзьдзя будзе весьці санстанцыя, некалькі лябараторый, Белгідрамэт. Інфармацыя будзе разьмяшчацца на завадзкой сьвятлодыёднай дошцы ў онлайнавым рэжыме, на сайце прадпрыемства і санстанцыі.

Але людзі вераць не афіцыйным паведамленьням, а сваім органам пачуцьцяў. «Сьмярдзіць сёньня з 5.30 раніцы! Нямоцна — але гэта дзякуючы таму, што вецер! Нас зноў труцяць», — кажуць вяскоўцы.

«Як у першыя дні пасьля Чарнобылю». Як жывуць вяскоўцы каля новага цэлюлёзнага заводу

«Вецер заходні — смурод накрывае вуліцу Школьную. Паўночна-заходні падзьме — пакутуе гароднінная фабрыка»

Жыхары Якімавай Слабады праз смурод з заводу мусілі асвоіць мэтэаралягічныя навыкі. Яны распавядаюць: калі будзе заходні вецер — смурод накрые вуліцу Школьную, дзіцячы сад, школу і старую краму. Калі паўднёвы ці паўднёва-заходні — будуць пакутаваць жыхары Цэнтральнай і раёну птушкафабрыкі. Паўночны і паўночна-заходні вецер дадасьць клопату жыхарам Новай, Садовай, Кветкавай. «Сёньня вецер пераменны. Таму смурод не такі моцны. Пасьля абеду моцна сьмярдзела на вуліцы Цэнтральнай. Каля гэтай хімічнай пачвары таксама невыносны пах», — зазначае жыхарка Якімавай Слабады Людміла Іванаўна. Яна жыве на вуліцы Сонечнай. Сёньня, дзякуючы паўночна-заходняму ветру, на яе вуліцы ня надта сьмярдзіць. Вяскоўка кажа, што людзі стаміліся скардзіцца, пісаць ва ўсе інстанцыі. «Нас запэўніваюць — усё добра, і будзе яшчэ лепш, на блакітным воку кажуць», — дадала Людміла Іванаўна.

«Лавіць» мэркаптаны прыехалі з расейскай лябараторыі

Тамара Паўлаўна жыве ў Якімавай Слабадзе ад нараджэньня. Цяпер ёй 60. «Я хачу спакойна жыць і памерці ў сваёй вёсцы. Нас труцяць, а яшчэ і падманваюць», — кажа вяскоўка. Зранку з прычыны смуроду яна выклікала МНС. Але там жанчыну «супакоілі» — ідуць пусканаладачныя работы на новым заводзе, не хвалюйцеся. «Як не хвалявацца, калі нам няма чым дыхаць? Зноў сьмярдзіць гэтай сапсаванай капустай!» — абураецца пэнсіянэрка.

На пусканаладачныя працы прыехалі праводзіць маніторынг шкодных выкідаў — газаў-мэркаптанаў — прадстаўнікі расейскай лябараторыі. У новага заводу пакуль не выпрацавана мэтодыка вызначэньня канцэнтрацыі мэркаптанаў, няма адмысловага абсталяваньня. Прадстаўнікоў расейскай лябараторыі і мясцовай санстанцыі Тамара Паўлаўна сустрэла ля дзіцячага садку — там яны бралі замеры. Жанчыне ўдалося высьветліць, што пробы, узятыя з чатырох пунктаў у Якімавай Слабадзе, будуць аналізавацца ў Маскве. «Прадстаўнік маскоўскай лябараторыі сказаў нам, што мы ня можам выклікаць іх, калі будзе сьмярдзець, бо замаўляў іх працу ЦКК, а ня мы», — дадала жанчына.

На абяцаньне пусьціць на завод грамадзкасьць забыліся?

На сходзе ў вёсцы Якімава Слабава 21 чэрвеня жыхары дамовіліся разам з уладай сачыць за пусканаладачнымі работамі на заводзе. На сустрэчы прысутнічала дэпутатка Палаты прадстаўнікоў Галіна Філіповіч. Яна прапанавала ўключыць у склад незалежнай камісіі вяскоўцаў і прадстаўнікоў ініцыятыўнай групы па маніторынгу сытуацыі з заводам.

«Відаць, забыліся на абяцаньне. Нас, прадстаўнікоў ініцыятыўнай групы, назіраць за пусканаладачнымі работамі не паклікалі. Я тэлефанавала актыўным жыхарам Якімавай Слабады — іх таксама не запрашалі. Казалі ж на сходзе — пойдзем разам, паглядзім... Насамрэч — не», — зазначыла жыхарка Сьветлагорску, праваабаронца Алена Масьлюкова. Яна кажа, што сёньня найбольшы смурод, паводле вяскоўцаў — у раёне гародніннай фабрыкі.

Жыхары Сьветлагорску і Якімавай Слабады прайшлі некалькі этапаў барацьбы за сваё права дыхаць чыстым паветрам. Пасьля шэрагу стыхійных сходаў яны напісалі дзясяткі зваротаў у органы ўлады. Падавалі пазоў у суд супраць цэлюлёзнага заводу і кітайскай карпарацыі САМСE на кампэнсацыю шкоды здароўю і маёмасьці.

«Зрабілі тут даліну сьмерці», — вяскоўцы супраць цэлюлёзнага заводу пад Сьветлагорскам

Завод беленай цэлюлёзы будуе Сьветлагорскі ЦКК. Меркавалася, што новы завод забясьпечыць патрэбы ўнутранага рынку і будзе вырабляць беленую цэлюлёзу на экспарт. Першапачаткова праект ацэньваўся на 700 мільёнаў даляраў. Амаль усе грошы атрыманыя з кітайскага крэдыту. Будаўнікі таксама кітайцы — кампанія САМСE.

У 2012 годзе ў Сьветлагорску сабралі больш за 10 тысячаў подпісаў супраць новага будаўніцтва. Але праект быў распачаты. Летась у лістападзе запусьцілі завод у тэставым рэжыме. Потым праца была спыненая. Пазьней кітайцы зьехалі на свае навагоднія вакацыі, якія расьцягнуліся ня менш, як на месяц.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG