Лінкі ўнівэрсальнага доступу

Кітай запусьціў сваю першую місію для вывучэньня Марса


Запуск «Т’яньвэнь-1», 23 ліпеня

Кітай запусьціў сваю першую аўтаматычную міжплянэтную станцыю «Т’яньвэнь-1». Яна павінна дасягнуць Марса 11 лютага 2021 году. Пра гэта паведамляе кітайскае дзяржаўнае агенцтва Xinhua.

Цяжкая ракета-носьбіт «Чанчжэн-5» з касьмічным апаратам на борце стартавала 23 ліпеня з касмадрому Вэньчан у паўднёвай правінцыі Хайнань. Прыкладна праз 36 хвілін пасьля пачатку палёту зонд пасьпяхова выйшаў на зададзеную арбіту.

«Т’яньвэнь-1» складаецца з арбітальнага апарата і пасадачнай плятформы з марсаходам.

Мэта місіі— пошук сьлядоў жыцьця на Марсе, а таксама вывучэньне магчымасьці калянізацыі плянэты чалавекам. Калі місія будзе праходзіць пасьпяхова, навукоўцы змогуць вывучыць атмасфэру плянэты, рэльеф, магнітнае поле ды іншыя асаблівасьці.

Місію назвалі «Т’яньвэнь» у гонар паэмы «Пытаньні да неба» старажытнакітайскага паэта Цюй Юаня.

Запуск «Т’яньвэнь-1» стаў ужо другой марсіянскай місіяй на гэтым тыдні. 20 ліпеня свой касьмічны апарат для вывучэньня Марса запусьцілі Аб'яднаныя Арабскія Эміраты.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG