Лінкі ўнівэрсальнага доступу

Першая арабская краіна накіравала касьмічны апарат на Марс 


Касьмічны зонд NASA на арбіце Марса, ілюстрацыйнае фота

Аб’яднаныя Арабскія Эміраты запусьцілі навуковы і тэхналягічны зонд на Марс. Гэта першая падобная місія, ініцыяваная арабскай краінай.

Запуск беспілётнага касьмічнага карабля «Аль-Амаль» (у перакладзе з арабскай «Надзея»), адбыўся 20 ліпеня пры дапамозе ракеты-носьбіта H-IIA з тэрыторыі навуковагу цэнтру Танегашыма на поўдні Японіі.

Плянуецца, што апарат дасягне Марсу ў лютым 2021 году і будзе знаходзіцца на арбіце як мінімум два гады. Касьмічная місія ААЭ каштуе 200 мільёнаў даляраў, заявіла міністарка перадавых навук Сара Аміры.

Зонд прызначаны для стварэньня поўнага ўяўленьня аб марсіянскай атмасфэры і штодзённага вывучэньня сэзонных зьменаў.

«Гэта даволі моцны сыгнал для арабскай моладзі: калі ААЭ аказаліся здатныя дасягнуць „чырвонай плянэты“ менш чым за 50 гадоў сваёй гісторыі, наступныя пакаленьні змогуць зрабіць значна больш», — заявіў Амран Шараф, дырэктар праекту «Місія Эміратаў на Марс».

Такім чынам, «Аль-Амаль» далучыцца сама меней да васьмі актыўных місій, якія вывучаюць Марс. Некаторыя зь іх знаходзяцца на арбіце вакол плянэты, іншыя працуюць на паверхні.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG