Лінкі ўнівэрсальнага доступу

Затрыманьні грамадзкіх актывістаў у Дзень незалежнасьці: Гомель, Масты, Барысаў. ВІДЭА

абноўлена

Падчас затрыманьняў у Мастах
Падчас затрыманьняў у Мастах

3 ліпеня, у дзяржаўнае сьвята Дзень незалежнасьці, у розных гарадах Беларусі адбыліся затрыманьні грамадзкіх актывістаў.

Гомель

3 ліпеня ў Гомлі міліцыя затрымала некалькіх актывістаў. Напярэдадні ў сацыяльных сетках анансавалі правядзеньне чарговай «акцыі салідарнасьці».

Сёньня на пляжы а 12-ай гадзіне меркавалася правесьці «акцыю салідарнасьці». Яе анансавалі ў сацыяльных сетках. Плянавалася, што ўдзельнікі акцыі прыйдуць на пляж, каб «адпачыць, пагуляць у розныя гульні, паесьці марозіва».

Прыкладна ў 11.50 міліцыя затрымала актывістку​ Алену Давыдаву.

Сьведкай затрыманьня стаў яе сябар Канстанцін, які распавёў Свабодзе акалічнасьці.

«Алена ішла адна, яна жыве ў Навабеліцы. За ёй ішлі двое „не па форме“ ад яе дому, трое міліцыянтаў пад’ехалі на службовым аўтамабілі, яшчэ двое ня ў форме падышлі і з ужываньнем сілы затрымалі Алену», — распавёў Канстанцін.

Алена Давыдава, фэльчарка «хуткай дапамогі», грамадзкая актывістка з каманды «кандыдатаў пратэсту» Мікалая Статкевіча, раней падавала дакумэнты на рэгістрацыю ініцыятыўных групаў прэтэндэнтаў на пасаду прэзыдэнта Беларусі, але яе ініцыятыўную групу не зарэгістравалі.

На гомельскім цэнтральным пляжы затрымалі актывіста Аляксея Раманава.

«Падышлі супрацоўнікі міліцыі, сказалі яму „Пройдзем“ і павялі ў службовы аўтамабіль», — паведаміў Свабодзе Віталь, прыяцель Аляксея. Ён быў сьведкам затрыманьня.

Аляксею Раманаву пры затрыманьні зрабілася блага, яму выклікалі «хуткую», ён адмаўляецца ехаць у шпіталь пад канвоем міліцыі.

Таксама міліцыя затрымала актывістку Сьвятлану Нарскіну. Зранку пад яе домам дзяжурылі супрацоўнікі міліцыі ў цывільным. Калі Сьвятлана выйшла з пад’езду — яе тут жа затрымалі.

Як паведаміў Свабодзе яе прыяцель Сьвятланы, яе павезьлі ў аддзел міліцыі на вуліцы Мазурава. Прычыны затрыманьня пакуль не вядомыя. Сьвятлана Нарскіна на мінулым тыдні атрымала штраф за тое, што размаўляла з мінакамі на вуліцы пра палітыку. Суд расцаніў гэта як парушэньне заканадаўства пра масавыя мерапрыемствы.

Актывісты раней паведамлялі, што каля іх дамоў дзяжураць супрацоўнікі ў цывільным. Прынамсі, шэрая «Лада» стаяла каля дому Юрыя Ўласава, які за падтрымку Сяргея Ціханоўскага адседзеў 45 сутак запар у ІЧУ.

Масты

У Мастах затрымалі актывіста Аляксандра Мілюка, які вяртаўся дадому з сынам, паведамляе праваабарончы цэнтар «Вясна». Да яго падышоў мужчына і пачаў патрабаваць нейкія грошы, штурхаць Аляксандра і нецэнзурна выказвацца ў ягоны адрас. Аляксандар Мялюк вёў відэазапіс таго, што адбываецца, на тэлефон.

У хуткім часе пад’ехала міліцэйская машына. Мялюк папрасіў засьцерагчы яго ад прыставаньняў невядомага мужчыны, але міліцыя затрымала і самога Аляксандра. Яго даставілі ў ізалятар часовага ўтрыманьня і пакінулі да суда, які пройдзе 6 ліпеня ў Скідзелі.

Таксама праваабаронцам «Вясны» стала вядома, што раніцай 3 ліпеня сябра ініцыятыўнай групы Сьвятланы Ціханоўскай са Скідзеля Яўгена Клімука выклікалі ў РАУС, а пазьней зьмясьцілі ў ізалятар часовага ўтрыманьня. Некалькі дзён таму ў яго канфіскавалі аўтамабіль і тэлефон за язду на машыне са сьцягам, а сёньня прадʼявілі яму пратакол паводле арт. 23.34 КаАП. У ізалятары Клімук прабудзе да панядзелка 6 ліпеня.

Барысаў

У Барысаве 3 ліпеня затрымалі трох чалавек, якія былі апранутыя ў майкі «3ИЮЛЯ», стылізаваных пад 3%. Прозьвішчы затрыманых удакладняюцца.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG