Лінкі ўнівэрсальнага доступу

Праваабаронца Стэфановіч назваў арышты ў «справе Ціханоўскага» адвольнымі затрыманьнямі


За апошні месяц за злачынства паводле часткі 1 артыкулу 342 Крымінальнага кодэксу ў Беларусі затрымалі і зьмясьцілі пад варту 17 чалавек, паведамляе Праваабарончы цэнтар «Вясна». Сярод іх — блогеры, актывісты, сябры ініцыятыўных групаў патэнцыйных кандыдатаў у прэзыдэнты, грамадзяне.

Тыя, каму ўжо прад’явілі абвінавачаньне, праходзяць у так званай «справе Ціханоўскага» пасьля інцыдэнту на выбарчым пікеце 29 траўня ў Горадні.

Намесьнік старшыні Праваабарончага цэнтру «Вясна» Валянцін Стэфановіч заяўляе, што крымінальны перасьлед і зьмяшчэньне пад варту паводле артыкулу 342 стаў новай формай адвольных затрыманьняў. Асноўная мэта — ізаляцыя на пэрыяд выбарчай кампаніі.

«Улады выкарыстоўваюць гэтыя падзеі як нагоду для затрыманьня ўсіх патэнцыйна небясьпечных людзей: блогераў, актывістаў і іншых. Падобна, ня надта клапоцяцца нават пра якасьць крымінальных справаў і ня дужа разлічваюць на іх судовыя пэрспэктывы. Зрэшты, практыка ня новая для Беларусі. Мы назіралі падобнае ў 2006 годзе са штабам кандыдата ў прэзыдэнты Аляксандра Мілінкевіча. Або перад чэмпіянатам сьвету ў хакеі, калі сотні актывістаў былі асуджаныя на працяглыя адміністрацыйныя арышты паводле артыкулу 17.1 КаАП (хуліганства)», — адзначыў Валянцін Стэфановіч.

Па яго словах, сёлета ўлады выкарыстоўваюць у якасьці падставаў для адвольных затрыманьняў крымінальны перасьлед паводле артыкулу 342. Тым больш, як паказала практыка «справы патрыётаў» у 2017 годзе, калі крымінальная справа спыняецца на этапе папярэдняга сьледзтва да суду, то ніякіх кампэнсацый ў сувязі з утрыманьнем пад вартай дамагчыся немагчыма. Гэта зручна для ўладаў: можна ледзь ня год утрымліваць чалавека ў СІЗА, а потым спыніць крымінальную справу і вызваліць без усякіх кампэнсацый, дадае Валянцін Стэфановіч.

Праваабарончы цэнтар «Вясна» катэгарычна пратэстуе супраць адвольных затрыманьняў блогераў, актывістаў, прадстаўнікоў апазыцыйных партый, сяброў ініцыятыўных групаў альтэрнатыўных вылучэнцаў і іншых грамадзян і патрабуе ад беларускіх уладаў іх неадкладнага вызваленьня.

Затрыманьні Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».

  • На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
  • Ціханоўскага трымаюць за кратамі з 29 траўня. Яго абвінавачваюць паводле чатырох артыкулаў Крымінальнага кодэксу:

ч. 1 арт. 293 (арганізацыя масавых беспарадкаў, да 15 гадоў зьняволеньня).

ч. 3 арт. 130 (распальваньне сацыяльнай варожасьці);

ч. 2 арт. 191 (перашкода працы ЦВК). Заяву на яго падала старшыня ЦВК Лідзія Ярмошына;

ч. 1 арт. 342 (арганізацыя дзеяньняў, што груба парушаюць грамадзкі парадак).

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG