Лінкі ўнівэрсальнага доступу

Трэцяя сьмерць мэдыка ў Барысаве. Санітар памёр ад пнэўманіі на наступны дзень пасьля шпіталізацыі


Ілюстрацыйнае фота
Ілюстрацыйнае фота

Уладзімер Фралоў працаваў санітарам у брыгадзе хуткай дапамогі ў Барысаве. 18 траўня яго шпіталізавалі з падазрэньнем на інфаркт, а на наступны дзень ён памёр у рэанімацыі. Выявілася, што прычынай сьмерці стала пнэўманія. Калегі мяркуюць, што санітар быў хворы на COVID-19.

Каранавірус у Беларусі і ў сьвеце. Як разьвіваюцца падзеі >>

60-гадовы Ўладзімер Фралоў больш за 20 гадоў працаваў на станцыі хуткай дапамогі ў Барысаве. Спачатку кіроўцам, а ў апошнія гады – санітарам. Пра гэта Свабодзе расказаў знаёмы Ўладзімера, мэдык з цэнтральнай раённай лякарні ў Барысаве.

Падчас эпідэміі каранавірусу Ўладзімер працаваў у брыгадзе, якая перавозіла пацыентаў на машыне хуткай дапамогі. Тых, хто меў пацьверджаны COVID-19, ягоная брыгада не перавозіла. Аднак гэта не выключае магчымага кантакту з інфікаванымі каранавірусам, сказаў мэдык з Барысава ў размове з карэспандэнтам Свабоды.

«Мэдыкі з такіх брыгад часам менш дбаюць пра сваю бясьпеку, бо лічыцца, што ў іх меншая рызыка натрапіць на пацыента з каранавірусам, — сказаў барысаўскі мэдык Свабодзе. — Але гэта ўсё адно небясьпечна».

Паводле яго, Уладзімеру стала блага 18 траўня. У гэты ж дзень яго шпіталізавалі з падазрэньнем на інфаркт. У той жа дзень паклалі ў рэанімацыю. На наступны дзень санітар памёр.

Сьмерць санітара пацьвердзіла кіраўніцтва станцыі хуткай дапамогі пры цэнтральнай раённай лякарні ў Барысаве. Па словах загадчыка, Фралоў памёр ад інфаркту.

Як стала вядома рэдакцыі, у пасьведчаньні аб сьмерці Ўладзімера Фралова напісана, што прычынай сьмерці стаў сындром рэсьпіратарнага расстройства, выкліканы двухбаковай пнэўманіяй. Пры гэтым калегі лічаць, што ва Ўладзімера Фралова быў і каранавірус.

«Невядома, ці рабілі тэст увогуле, — кажа супрацоўнік шпіталя. — Мая думка, што гэта быў каранавірус. Вельмі высокая імавернасьць. Ад звычайнай пнэўманіі людзі не паміраюць на другі дзень».

У доказ таго, што ў санітара мог быць каранавірус, мэдык прыводзіць той факт, што ўскрыцьцё цела Ўладзімера рабілі не ў Барысаве, а ў Менскім абласным моргу. Туды звычайна адвозяць нябожчыкаў, якія або дакладна памерлі ад каранавірусу, або мяркуецца, што гэта так.

Гэта трэцяя сьмерць мэдыка ў цэнтральнай раённай лякарні Барысава падчас эпідэміі каранавірусу. 8 красавіка памёр фэльчар хуткай дапамогі Васіль Ліпінін, а 16 траўня — мэдсястра Тацяна Кавалёнак. Абое мелі пацьверджаны каранавірус.

У Барысаўскім раёне пад лячэньне хворых на пнэўманію і COVID-19 перапрафілявалі дзьве лякарні — гарадзкую №2 і ўчастковую лякарню ў вёсцы Лошніца. Агулам гэта каля 500 ложкаў. Таксама частку пацыентаў адпраўляюць у шпіталі Жодзіна і Крупак.

Паводле вядомай СМІ інфармацыі, з 16 па 19 траўня ў Беларусі ад пнэўманіі і каранавірусу загінулі чацьвёра мэдыкаў: мэдсястра і санітар у Барысаве, мэдсястра ў Пінску і лекар у Салігорску.

Свабода вядзе ўлік мэдыкаў, якія загінулі падчас пандэміі, у праекце «Сьпіс памяці». На сёньня ў ім ужо імёны 18 мэдсясьцёр, фэльчараў, лекараў і кіроўцаў, якія сталі ахвярамі пнэўманіі і каранавірусу.

Што трэба ведаць пра новы каранавірус з Кітаю

  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

Найважнейшыя пытаньні і адказы пра каранавірус

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG