Удзельнік «Моладзевага блёку» Пятро Маркелаў 21 траўня выйшаў на волю пасьля 10 сутак арышту.
Як адзначае «Прававая ініцыятыва», Маркелава вызвалілі на 3 гадзіны пазьней, чым павінны былі. Яго вывезьлі з Цэнтру ізаляцыі правапарушальнікаў, вазілі па горадзе і праводзілі прафіляктычную размову.
Маркелава затрымалі ў судзе Савецкага раёну Менску 11 траўня, дзе ён чакаў выракаў паплечнікам. Першапачаткова сьцьвярджалася, што яго нібыта затрымлівалі з прычыны падабенства да злачынцы, які ў вышуку; затым — за непадпарадкаваньне супрацоўнікам міліцыі.
Але на судзе 13 траўня Маркелава абвінавацілі ў тым, што ён «наўмысна, з хуліганскім намерам лёг на лаўку і ажыцьцяўляў відэаздымку грамадзян, на неаднаразовыя заўвагі грамадзян не рэагаваў, чым наўмысна парушаў дзейнасьць арганізацыі суду Савецкага раёну Менску, праявіўшы відавочную непавагу да грамадзтва».