Мы сабралі для вас навіны зь Беларусі і сьвету, датычныя каранавірусу, за 19 траўня.
Каранавірус у Беларусі і ў сьвеце. Як разьвіваюцца падзеі >>
- Міністэрства аховы здароўя Беларусі апублікавала 19 траўня новую афіцыйную статыстыку распаўсюду COVID-19. Паводле міністэрства, на 19 траўня ў Беларусі агулам 31 508 чалавек са станоўчым тэстам на COVID-19. 175 памерлых. За дзень выявілі яшчэ 936 выпадкі і прызналі 4 сьмерці.
- Міністар аховы здароўя Ўладзімер Каранік 19 траўня наведаў віцебскую абласную клінічную бальніцу, дзе даў ацэнку сытуацыі па захворваньнях на пнэўманіі ў рэгіёне. Каранік заявіў, што пік эпідэміі каранавірусу пройдзены
- Аляксандар Лукашэнка 19 траўня падпісаў указ «Аб працягненьні тэрміна дзеяньня дакумэнтаў». Усе дакумэнты, тэрмін дзеяньня якіх сканчваецца ў пэрыяд з 30 красавіка па 31 ліпеня 2020 года, застануцца дзейнымі яшчэ тры месяцы. Напрыклад, калі тэрмін дзеяньня пашпарта скончыўся 15 траўня, ён застанецца дзейнымі да 15 жніўня 2020 года.
- У сувязі з пандэміяй ураду Беларусі прапанавалі праект пастановы, якая дазваляе інтэрнэт-гандаль алькаголем.
- Выпускных вечароў для школьнікаў у Менску сёлета ня будзе.
- У Маладэчне адмянілі нацыянальны фэстываль беларускай песьні і паэзіі, які праводзіўся з 1993 году.
- Symbal.by папрасіў дапамогі: скончыліся грошы на пашыў павязак мэдыкам.
- Канфэрэнцыя Сусьветнай арганізацыі здароўя на ўзроўні міністраў аховы здароўя падтрымала рэзалюцыю, у якой гаворыцца аб неабходнасьці старанна расьсьледаваць меры, прынятыя рознымі краінамі сьвету ў адказ на пандэмію каранавіруснай інфэкцыі.
- Галоўная санітарная лекарка расейскага Cанкт-Пецярбургу Натальля Башкетава зрабіла больш жорсткімі правілы пахаваньня праз «пагаршэньне эпідэміялягічнага становішча». Сваякам забаранілі разьвітаньне з памерлымі незалежна ад прычынаў сьмерці.
- Бразылія выйшла на трэцяе месца ў сьвеце па колькасьці інфікаваных каранавірусам. За апошнія дні Бразылія абагнала па ліку заражэньняў Гішпанію, Італію, Францыю і Вялікабрытанію. Пры гэтым экспэрты падазраюць, што інфікаваных у краіне больш у 15 разоў.
