Лінкі ўнівэрсальнага доступу

Сусьветная арганізацыя супраць катаваньняў устрывожаная штрафамі і арыштамі актывістаў у Беларусі


Ілюстрацыйнае фота. Журналіст Алесь Асіпцоў, асуджаны на 10 сутак арышту, пасьля суду ў Магілёве. 12 траўня 2020 году
Ілюстрацыйнае фота. Журналіст Алесь Асіпцоў, асуджаны на 10 сутак арышту, пасьля суду ў Магілёве. 12 траўня 2020 году

Масавыя рэпрэсіі ў дачыненьні да прадстаўнікоў грамадзянскай супольнасьці Беларусі ў кантэксьце прэзыдэнцкай кампаніі выклікаюць асаблівую трывогу, заявіў генсакратар Сусьветнай арганізацыі супраць катаваньняў (OMCT) Джэральд Стэйбрэк у камэнтары, разьмешчаным на сайце Міжнароднай фэдэрацыі за правы чалавека (FIDH).

Ён дадаў, што асабліва трывожыць перасьлед прадстаўнікоў ліквідаванага ўладамі праваабарончага цэнтру «Вясна», які вёў незалежнае назіраньне на папярэдніх выбарах. Магчымасьці ж назіраньня за выбарамі міжнародных назіральнікаў абмежаваныя з прычыны пандэміі каранавірусу.

«З улікам працяглага вопыту парушэньняў правоў чалавека з боку беларускіх уладаў і аўтарытарнага характару ўраду гэтыя падзеі прымушаюць нас баяцца, што сытуацыя з палітычнымі свабодамі ў Беларусі з набліжэньнем выбараў толькі пагоршыцца», — дадаў Стэйбрэк.

Абсэрваторыя абароны праваабаронцаў (сумесная праграма FIDH і OMCT) і «Вясна» заклікалі беларускія ўлады вызваліць затрыманых за апошнія дні актывістаў і спыніць перасьлед удзельнікаў мірных акцый.

Раней пра занепакоенасьць нядаўнімі затрыманьнямі ў Беларусі ў сувязі з будучымі прэзыдэнцкімі выбарамі выказвалі ў Эўразьвязе. А прадстаўнік АБСЭ і «Рэпартэры бязь межаў» заклікалі неадкладна вызваліць арыштаваных у Беларусі журналістаў.

У пачатку траўня ў Беларусі прайшлі пратэсы супраць правядзеньня вайсковага параду падчас пандэміі каранавірусу, якія перайшлі ў акцыі супраць зьняволеньня блогера Сяргея Ціханоўскага, які клікаў на «антыпарад». За апошнія дні ў Беларусі затрымалі і асудзілі дзясяткі чалавек, у тым ліку журналістаў, якія асьвятлялі акцыі, а таксама актывістаў праваабарончага цэнтру «Вясна» Аляксандра Буракова, Алену Масьлюкову і Ўладзімера Вялічкіна.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG