Лінкі ўнівэрсальнага доступу

Афіцыйна: Каранавірус пацьвердзілі ў дзяцей з асаблівасьцямі з дому-інтэрнату на Магілёўшчыне


Вясноўскі дом-інтэрнат
Вясноўскі дом-інтэрнат

Магілёўскі аблвыканкам прызнаў заражэньне каранавірусам выхаванцаў Вясноўскага дому-інтэрнату для дзяцей-інвалідаў з асаблівасьцямі псыхафізычнага разьвіцьця, але не назваў колькасьць інфікаваных.

Паводле зьвестак дабрачыннага фонду Chernobyl Children International, на COVID-19 захварэлі 13 дзяцей.

Каранавірус выявілі спачатку ў работніцы дому-інтэрнату, а потым узялі мазкі ва ўсяго пэрсаналу і выхаванцаў, паведаміў 24 красавіка абласны камітэт працы, занятасьці і сацыяльнай абароны насельніцтва.

«У некаторых былі атрыманыя станоўчыя вынікі. У бальшыні зь іх сымптомаў хваробы няма», — гаворыцца ў паведамленьні камітэту, якое падае дзяржаўнае агенцтва Mogilevnews.by.

Міжнародны фонд Chernobyl Children International: заразіліся прынамсі 13 дзяцей і 10 супрацоўнікаў

Пра тое, што санітарка дому-інтэрнату захварэла на каранавірус, стала вядома 21 красавіка. Тады дырэктар установы Вячаслаў Клімовіч прызнаў, што яго падначаленую шпіталізавалі, але ўхіліўся ад адказу на пытаньне, ці заразіліся ад яе выхаванцы.

23 красавіка ў інтэрвію ірляндзкаму тэлеканалу RTE заснавальніца міжнароднага фонду Chernobyl Children International Эдзі Рош (Adi Roche) заявіла, што ў Вясноўскім доме-інтэрнаце, зь якім ейная арганізацыя шмат гадоў супрацоўнічае, адбылася ўспышка каранавірусу. Паводле Эдзі Рош, прынамсі 13 дзяцей заразіліся і ім пагражае небясьпека, бо ў сувязі з генэтычнымі асаблівасьцямі разьвіцьця ў іх аслаблены імунітэт. Яна таксама заявіла, што каранавірус пацьвердзілі ў 10 супрацоўнікаў дому-інтэрнату.

Вясноўскі дом-інтэрнат — за 18 кілямэтраў ад Глуску. У ім 170 гадаванцаў, якія маюць патрэбу ў спэцыяльным навучаньні, асаблівым клопаце, бытавым і мэдычным абслугоўваньні. У бальшыні бацькі пазбаўленыя бацькоўскіх правоў ці самі адмовіліся ад дзяцей з асаблівасьцямі разьвіцьця.

Паводле Мінздароўя, на 24 красавіка ў Магілёўскай вобласьці было 396 пацьверджаных выпадкаў захворваньня на COVID-19.

Што трэба ведаць пра новы каранавірус, які выклікае COVID-19

  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

Найважнейшыя пытаньні і адказы пра каранавірус

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG