Лінкі ўнівэрсальнага доступу

У Магілёве вучням і настаўнікам забаранілі камэнтаваць у сацыяльных сетках допісы пра каранавірус


Ілюстрацыйнае фота ©Shutterstock

У аддзеле адукацыі Магілёўскага райвыканкаму Свабодзе сказалі, што гэта не распараджэньне, а «проста была даведзеная інфармацыя».

Каранавірус у Беларусі і ў сьвеце. Як разьвіваюцца падзеі >>

Дакумэнт, пад якім значыцца прозьвішча начальніка аддзелу адукацыі Магілёўскага райвыканкаму Натальлі Колас, зьявіўся на тэлеграм-канале NEXTA.

У ім аддзел адукацыі Магілёўскага райвыканкаму забараніў вучням і работнікам установаў адукацыі ставіць падабайкі ў сацыяльных сетках, рабіць спасылкі і камэнтаваць «усялякую» інфармацыю, зьвязаную з пашырэньнем каранавіруснай інфэкцыі.

Гэта адна зь мераў дзеля «забесьпячэньня эпідэміялягічнага рэжыму ва ўстановах адукацыі».

Кіраўнікі ўстановаў адукацыі павінны пазнаёміць з гэтымі правіламі вучняў, работнікаў і бацькоў.

Натальля Колас спытала ў карэспандэнта Свабоды, ці ёсьць яе подпіс пад гэтым дакумэнтам. Маўляў, «ці мала хто можа гэта напісаць».

«Я цяпер знаходжуся ў камандзіроўцы. Пакуль нічога не магу сказаць», — сказала Натальля Колас.

Што трэба ведаць пра новы каранавірус, які выклікае COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

25 новых адказаў пра каранавірус ад Сусьветнай арганізацыі здароўя, мэдычных аўтарытэтаў і з найлепшай практыкі

Пашырэньне каранавірусу ў сьвеце. Гадзіна за гадзінай

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG