Лінкі ўнівэрсальнага доступу

«У сьвеце ўжо эканамічны крызіс»: Што будзе зь беларускай эканомікай на фоне пандэміі каранавірусу


Ілюстрацыйнае фота

12 сакавіка пяцёрка найбуйнейшых тэхналягічных кампаніяў сьвету (Amazon, Apple, Alphabet, Facebook і Microsoft) страцілі ў суме $416,63 мільярда на фондавых біржах. Тое, што адбываецца з эканомікай сьвету падчас эпідэміі каранавірусу, ужо называюць эканамічным крызісам. Разьбіраемся, як гэта закране Беларусь.

Беларускія кампаніі ўжо губляюць грошы

Найбольшая беларуска-амэрыканская ІТ-кампанія EPAM Systems страціла больш за 2 мільярды даляраў падчас таргоў на фондавых біржах 12 сакавіка, калі рынкі надалей падалі з прычыны пашырэньня каранавірусу і яго меркаванага ўплыву на эканоміку. Усё больш фінансавыя рынкі цярпяць праз пандэмію. Паглядзім, што будзе ў такой сытуацыі зь беларускай эканомікай.

Наўпрост падзеньне ўсясьветных фондавых рынкаў Беларусь не закране, але гэта ўжо «фінансавы крызіс».

«Рынкі абваліліся больш чым на 20%. Такіх падзеньняў не было нават падчас крызісу 2008 году. Пэўныя біржы перажылі найбуйнейшае падзеньне за ўсю гісторыю. Але ў Беларусі асаблівая пазыцыя. Такі крызіс пашыраецца празь фінансавыя рынкі, капіталы бягуць найперш з разьвіцьцёвых краін, інвэстары прадаюць аблігацыі. Але па Беларусі ня ходзяць інвэстары з валізкамі, таму і бегчы няма каму», — тлумачыць старэйшы аналітык кампаніі «Альпары» Вадзім Іосуб.

Крызіс можа прыйсьці ў Беларусь з Расеі

Але крызіс Беларусь усё ж закране — праз рэальны сэктар, і прыйдзе ён з Расеі, бо гэта найбуйнейшы экспартны рынак для Беларусі.

«Узьнікнуць цяжкасьці ў расейскіх прадпрыемстваў, і яны зьнізяць экспарт беларускай прадукцыі. Мы бачым зьніжэньне расейскага рубля адносна беларускага. Значыць, для расейцаў нашы тавары стануць даражэйшыя. Значыць, беларускія прадпрыемствы будуць менш зарабляць, зьнізіцца прыток валюты ў краіну», — кажа Вадзім Іосуб.

Можа паўтарыцца крызіс 2009 году

Калі ў Беларусі будзе менш замежнай валюты, будзе большым ціск на беларускі рубель, а гэта значыць, будзе рызыка дэвальвацыі. Падобным чынам на Беларусі адбіўся фінансавы крызіс 2008 году. 1 студзеня 2009 году даляры ў абменьніках падаражэлі на 20,45%.

«Аналягічна разьвівалася сытуацыя ў 2008–2009 гадах. Тады крызіс сур’ёзна закрануў Расею. У пачатку 2009 году ён дайшоў да Беларусі, тады сьвет ужо пачаў падымацца ад крызісу, а да нас гэта дакацілася», — прыгадвае Вадзім Іосуб.

Але пакуль беларускі рубель не дэвальваваны, валютны кошык вырас на 0,14%. Моцныя хваляваньні расейскага рубля толькі адбіваюцца на суаднясеньні беларускага рубля з далярам.

Што трэба ведаць пра новы каранавірус COVID-19

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

24 новыя адказы пра каранавірус ад Сусьветнай арганізацыі здароўя, мэдычных аўтарытэтаў і з найлепшай практыкі

Колькі чалавек з каранавірусам памерлі ў Беларусі

На 5 красавіка Міністэрства аховы здарўя пацьвердзіла 562 выпадкі каранавірусу і 8 сьмерцяў. Вось вядомыя на гэты час ахвяры:

  1. 73-гадовая пэнсыянэрка Аляксандра Чэпік, памерла ўвечары 30 сакавіка ў Віцебскім абласным клінічным спэцыялізаваным цэнтры (ВАКСЦ, былы чыгуначны шпіталь).​
  2. 75-гадовы актор Драматычнага тэатра імя Якуба Коласа Віктар Дашкевіч, памёр у ноч з 30 на 31 сакавіка ў ВАКСЦ.
  3. 70-гадовая настаўніца зь вёскі Новыя Доктаравічы (Менская вобласьць) Натальля А., памерла 1 красавіка ў Капыльскай цэнтральнай раённай бальніцы.
  4. 70-гадовы вайсковы пэнсіянэр Уладзімер Сідараў, памёр 2 красавіка ў ВАКСЦ.​
  5. 67-гадовая Вольга Дзеравянка, памерла 1 красавіка ў 2-й гарадзкой клінічнай лякарні Менску.
  6. 60-гадовы мянчук памёр у сталічным інфэкцыйным шпіталі 3 красавіка.
  7. 4 красавіка o менскай інфэкцыйнай бальніцы памёр 69-гадовы былы супрацоўнік Нацыянальнага банку Юры Осіпаў. У яго была пнэўманія, выкліканая вірусам COVID-19.
  8. У Віцебску яшчэ 28 сакавіка памерла работніца фабрыкі «Чырвоны Кастрычнік» Галіна Шастоўская. Ёй было 54 гады. Дачка жанчыны распавяла tut.by, што яе мама «літаральна за пяць дзён згарэла ад пнэўманіі», у яе «быў пацьверджаны каранавірус».

Пашырэньне каранавірусу ў сьвеце. Гадзіна за гадзінай

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG