Лінкі ўнівэрсальнага доступу

Расейскія дэпутаты вітаюць ідэю спрашчэньня выдачы пашпартоў беларусам


Расейскі ўрад падрыхтаваў законапраект аб спрашчэньні выдачы пашпартоў Расейскай Фэдэрацыі грамадзянам Беларусі, Казахстану, Малдовы і Ўкраіны.

Калі праект будуць разглядаць, невядома. «Вести» сьцьвярджаюць, што гэта можа адбыцца «да канца лютага 2020 году».

Але абмеркаваньні ў СМІ ўжо пачаліся. Так, сэнатар Савету Фэдэрацыі (верхняй палаты парлямэнту) Сяргей Цекаў заявіў РИА Новости, што ініцыятыву «варта вітаць», бо грамадзяне названых краінаў гэта «блізкія ў мэнталітэце да расейцаў людзі».

«Усё, што паскарае атрыманьне расейскага грамадзянства, а ў РФ едуць у асноўным нашы суайчыньнікі, можна толькі вітаць», — сказаў Цекаў, адзначыўшы, што спрашчэньне атрыманьня пашпартоў «збліжае народы».

А кіраўнік камітэту Дзяржаўнай думы (ніжняй палаты парлямэнту) Леанід Калашнікаў адзначыў, што законапраект «дазволіць вырашыць дэмаграфічную праблему і паспрыяе рэпатрыяцыі». У сьпіс краінаў, дадаў ён, увайшлі тыя, у якіх пражывае найбольш «суайчыньнікаў», і гэты сьпіс могуць дапоўніць.

Як сьцьвярджаецца ў расейскіх СМІ, законапраект дазваляе атрымаць расейскі пашпарт, не адмовіўшыся ад другога грамадзянства (у Беларусі двайное грамадзянства не дазволенае і не забароненае). Для атрыманьня пашпарту, калі праект прымуць, ня трэба будзе жыць на тэрыторыі Расеі цягам пяці гадоў і даказваць належны матэрыяльны стан, а супругам грамадзянаў можна будзе атрымаць расейскае грамадзянства праз год пасьля шлюбу (пакуль — праз тры гады).

У канцы студзеня 2020 году МУС Расеі выступіла за адмену спэцыяльнай гутаркі для праверки веданьня расейскай мовы пры атрыманьні расейскага грамадзянства ўкраінцамі і беларусамі.

Працоўная група па рэалізацыі канцэпцыі дзяржаўнай міграцыйнай палітыкі, якая падрыхтавала згаданыя папраўкі, была створаная ў сакавіку 2019 году распараджэньнем прэзыдэнта Уладзіміра Пуціна. Задача гэтай групы — прыцягнуць у Расію як мага больш новых грамадзян, ад 5 да 10 мільёнаў.

У ліпені летась Уладзімір Пуцін падпісаў указ аб пашырэньні спрошчанага парадку атрыманьня расейскага грамадзянства для ўсіх жыхароў Данецкай і Луганскай абласьцей Украіны. Раней расейскі пашпарт паводле гэтай працэдуры маглі атрымаць толькі жыхары так званых «ДНР» і «ЛНР».

Урад Украіны прызнаў незаконнымі расейскія пашпарты, выдадзеныя паводле гэтай працэдуры. З аналягічнымі заявамі выступілі ўлады Канады і прадстаўнікі Эўразьвязу.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG