Лінкі ўнівэрсальнага доступу

Настаўніца не працуе. Чым завяршыўся скандал з парваным вухам вучаніцы ў гомельскай школе


Міліцыя вынесла пастанову аб спыненьні праверкі ў дачыненьні настаўніцы трэцяй клясы гомельскай гімназіі № 71, на якую паскардзілася адна з маці з прычыны траўмаваньня дачкі-вучаніцы.

Заяўніцы ў міліцыі растлумачылі права распачаць у судзе справу прыватнага абвінавачваньня. Настаўніца дагэтуль не працуе — знаходзіцца на бальнічным.

Што гэта значыць?

Паводле артыкулу 426 Крымінальна-працэсуальнага кодэксу, крымінальную справу прыватнага абвінавачваньня распачынае асоба, пацярпелая ад злачынства. У выпадку яе няздольнасьці з прычыны ўзросту або стану здароўя выказваць сваю волю ў крымінальным працэсе — любы зь яе паўналетніх блізкіх сваякоў або членаў сям'і, законны прадстаўнік або прадстаўнік юрыдычнай асобы шляхам падачы ў суд заявы.

Паводле інфармаванай крыніцы, у дзеяньнях настаўніцы ёсьць склад злачынства паводле артыкулу 153 Крымінальнага кодэксу – наўмыснае прычыненьне лёгкага цялеснага пашкоджаньня. Але зьвярнуцца ў суд маюць права бацькі школьніцы, калі яны пажадаюць.

Што здарылася ў школе

Інцыдэнт здарыўся 21 студзеня на ўроку матэматыкі. «Вучаніцу К. спачатку выклікалі да дошкі. Яна не рашыла прыкладаў. Потым мы самі рашалі, за партамі. І яна за палову ўрока нічога не напісала. А потым... У яе ўтварыўся шрам на вуху. Ну, настаўніца яе так пацягнула», — расказваў аднаклясьнік пацярпелай з гімназіі № 71.

«Незалежна ад сукупнасьці абставінаў, рэакцыя пэдагога на паводзіны вучаніцы была недапушчальнай», — выказвалася на афіцыйным сайце Міністэрства адукацыі з нагоды канфлікту ў гімназіі № 71 Гомля.

У ведамстве запэўнівалі, што неаднаразова нагадвалі пра недапушчальнасьць праяў агрэсіі альбо гвалту ў дачыненьні да непаўналетніх.

«З нагоды таго, што адбылося ў ДУА „Гімназія № 71 г. Гомля», цяпер праводзіцца ўнутранае расьсьледаваньне, па выніках якога будуць прынятыя адпаведныя кіраўнічыя рашэньні», — гаворыцца ў паведамленьні.

Настаўніца ня вернецца на працу?

Свабодзе стала вядома, што настаўніца ня будзе больш працаваць у гімназіі №71. Пра такое рашэньне яна паведаміла кіраўніцтву, але афіцыйна пакуль знаходзіцца на бальнічным.

На сайце ўстановы адукацыі паведамляецца, што ў 2017 годзе Тацяна П. атрымала званьне «Настаўніца году» за тое, што разам са сваімі вучнямі заваявала для гімназіі пяць дыплёмаў пераможцаў прадметных алімпіяд.

Гэтая публікацыя падрыхтаваная з выкарыстаньнем інфармацыі БелаПАН.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG