Лінкі ўнівэрсальнага доступу

У Кітаі тым, хто хавае сымптомы каранавіруса, ад 15 лютага пагражае сьмяротнае пакараньне


Наўмыснае ўтойваньне або няправільнае паведамленьне пра сымптомы новага каранавіруса COVID-19 будзе лічыцца крымінальным злачынствам, абвясьціў 15 лютага суд у Кітаі. Пра гэта паведамляе агенцтва БЕЛТА са спасылкай на кітайскую газэту Beijing Daily.

За такія паводзіны парушальнікам пагражае сьмяротнае пакараньне. Утойваньне гісторыі падарожжаў таксама будзе расцэнена як злачынства, адзначыў суд.

Калі з прычыны хваробы чалавека вірус распаўсюдзіцца далей і выкліча іншыя заражэньні, хворага могуць абвінаваціць у пагрозе грамадзкай бясьпецы, паведамляе выданьне. У асобных выпадках за гэта прадугледжваецца пакараньне ў выглядзе пазбаўленьня волі тэрмінам да 10 гадоў, пажыцьцёвага зьняволеньня або нават сьмяротнае пакараньне.

Кітайская нацыянальная камісія ў справе аховы здароўя забараніла людзям з кашлем, ліхаманкай або іншымі сымптомамі хваробы падарожнічаць любымі відамі грамадзкага транспарту.

Для барацьбы з эпідэміяй ўсе людзі, якія вяртаюцца ў Пэкін з іншых гарадоў і рэгіёнаў, павінны заставацца на карантыне на працягу 14 дзён. Парушальнікаў будуць караць.

Колькасьць пацьверджаных выпадкаў заражэньня каранавірусам у сьвеце цяпер складае 66 492. Паводле дадзеных Цэнтру сыстэмных дасьледаваньняў і інжынірынгу пры Ўнівэрсытэце Джона Гопкінса ў ЗША, 8399 чалавек вылечыліся ад гэтай хваробы.

Абмежаванае хаджэньне наяўных грошай

Народны банк Кітаю выпусьціў на рынак каля 600 мiльярдаў юаняў новымі банкнотамі ў сувязі з распаўсюджваньнем каранавіруса. Выкарыстаныя купюры адправяць на дэзінфэкцыю, а потым паставяць на карантын да 14 дзён, паведаміў намесьнік кіраўніка кітайскага Народнага банку Фань Іфэй, піша брытанская Daily Mail.

У горад Ухань, зь якога пачалося распаўсюджваньне новага каранавіруса, былі накіраваны 4 млрд юаняў у новых банкнотах, таксама быў прыпынены рух наяўнасьці паміж правінцыямі і ўнутры правінцый з найбольш цяжкай эпідэміялягічнай сытуацыяй. Улады Кітаю лічаць, што такія меры дапамогуць зьнізіць рызыку распаўсюджваньня заражэньняў.

У рэгіёнах, дзе зарэгістравана больш за ўсё тых, хто заразіўся, банкноты пройдуць ўльтрафіялетавую або высокатэмпэратурную дэзінфэкцыю і будуць захоўвацца ў банку два тыдні. Толькі пасьля гэтага іх зноў вернуць у абарачэньне.

Купюры, якія паступаюць з мэдычных устаноў і рынкаў, павінны падвяргацца спэцыяльнай апрацоўцы і захоўвацца ізалявана. Пасьля дэзінфэкцыі яны застануцца ў Народным банку, выдаваць іх не плянуюць.

Што трэба ведаць пра новы каранавірус з Кітаю

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

24 новыя адказы пра каранавірус ад Сусьветнай арганізацыі здароўя, мэдычных аўтарытэтаў і з найлепшай практыкі

Колькі чалавек з каранавірусам памерлі ў Беларусі

На 5 красавіка Міністэрства аховы здарўя пацьвердзіла 562 выпадкі каранавірусу і 8 сьмерцяў. Вось вядомыя на гэты час ахвяры:

  1. 73-гадовая пэнсыянэрка Аляксандра Чэпік, памерла ўвечары 30 сакавіка ў Віцебскім абласным клінічным спэцыялізаваным цэнтры (ВАКСЦ, былы чыгуначны шпіталь).​
  2. 75-гадовы актор Драматычнага тэатра імя Якуба Коласа Віктар Дашкевіч, памёр у ноч з 30 на 31 сакавіка ў ВАКСЦ.
  3. 70-гадовая настаўніца зь вёскі Новыя Доктаравічы (Менская вобласьць) Натальля А., памерла 1 красавіка ў Капыльскай цэнтральнай раённай бальніцы.
  4. 70-гадовы вайсковы пэнсіянэр Уладзімер Сідараў, памёр 2 красавіка ў ВАКСЦ.​
  5. 67-гадовая Вольга Дзеравянка, памерла 1 красавіка ў 2-й гарадзкой клінічнай лякарні Менску.
  6. 60-гадовы мянчук памёр у сталічным інфэкцыйным шпіталі 3 красавіка.
  7. 4 красавіка o менскай інфэкцыйнай бальніцы памёр 69-гадовы былы супрацоўнік Нацыянальнага банку Юры Осіпаў. У яго была пнэўманія, выкліканая вірусам COVID-19.
  8. У Віцебску яшчэ 28 сакавіка памерла работніца фабрыкі «Чырвоны Кастрычнік» Галіна Шастоўская. Ёй было 54 гады. Дачка жанчыны распавяла tut.by, што яе мама «літаральна за пяць дзён згарэла ад пнэўманіі», у яе «быў пацьверджаны каранавірус».

Пашырэньне каранавірусу ў сьвеце. Гадзіна за гадзінай

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG