Лінкі ўнівэрсальнага доступу

У храмах анэксаванага Крыму распарадзіліся маліцца пра дождж


Царкоўная служба ў Сімфэропалі, люты 2019 году
Царкоўная служба ў Сімфэропалі, люты 2019 году

Па распараджэньні «кіруючага архірэя» у храмах Сімфэропальскай і Крымскай эпархіі пачаліся набажэнствы «пра дараваньне вільгаці», паведамляе агенцтва «Интерфакс» са спасылкай на крыніцы ў прэс-службе эпархіі.

Суразмоўца агенцтва ўдакладніў, што такія малебны арганізуюць ня першы раз, і звычайна іх пачынаюць праводзіць пасьля звароту ўладаў у эпархію. «Нехта з адміністрацыі зьвярнуўся на мінулым тыдні», — удакладніў ён.

Празь бясьсьнежную зіму і адсутнасьць ападкаў анэксаванаму Расеяй Крыму пагражае засуха: запасаў у вадасховішчах Сімфэропалю засталося толькі на 90-100 дзён. Напярэдадні стала вядома, што ў Сімфэропалі ўводзіцца абмежаваньне на падачу вады — з 10 лютага жыхары змогуць карыстацца ёй толькі на працягу чатырох гадзін раніцай і яшчэ чатырох — увечары. Гарачую ваду ў будныя дні будуць адключаць цалкам.

Да 2014 году каля 85% патрэбаў жыхароў Крыму ў вадзе забясьпечваў Паўночна-Крымскі канал — вада па ім ішла з Украіны. Але пасьля анэксіі Крыму Расеяй Украіна спыніла пастаўкі вады. З тых часоў афіцыйная пазыцыя Кіева не мянялася: канал адкрыюць толькі пасьля аднаўленьня тэрытарыяльнай цэласнасьці Ўкраіны.

Цяпер асноўныя вадасховішчы Крыму запоўненыя на 37%, гэтых запасаў хопіць толькі да чэрвеня. Найбольш напружаная сытуацыя ў сувязі з адсутнасьцю ападкаў склалася ў Сімфэропалі, дзе ўзровень вады ў два разы ніжэйшы, чым год таму.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG