Лінкі ўнівэрсальнага доступу

Сталічная міліцыя за пяць дзён да мітынгу супраць інтэграцыі склала пратакол на актывіста апазыцыі


Барыс Анікееў, архіўнае фота

Гомельскі актывіст руху «За свабоду» Барыс Анікееў атрымаў поштай адміністрацыйны пратакол, складзены сталічнай міліцыяй за ўдзел у акцыі супраць інтэграцыі Беларусі і Расеі. Міліцыя абвінаваціла яго ва ўдзеле ў акцыі 20 сьнежня. Пратакол складзены за пяць дзён да мітынгу — 15 сьнежня.

«Можна гаварыць аб прарочых здольнасьцях сталічнай міліцыі. 15 сьнежня я ня ведаў, ці паеду ў Менск 20-га на акцыю — а на мяне ўжо загадзя склалі пратакол», — паведаміў Свабодзе Барыс Анікееў.

Пратакол склаў намесьнік начальніка аддзелу правапарадку міліцыі грамадзкай бясьпекі Ленінскага РУУС Менску падпалкоўнік Мікалай Ермалінскі. У дакумэнце, датаваным 15 сьнежня, зазначана, што Барыс Анікееў 20 сьнежня «прыняў актыўны ўдзел у несанкцыянаваным мітынгу з мэтай публічнага выказваньня свайго пратэсту супраць інтэграцыі Беларусі і Расеі, выкрыкваў лёзунгі «Жыве Беларусь!», «Ганьба!», «Верым, можам, пераможам».

Актывіст руху «За свабоду» сапраўды прымаў удзел у акцыях супраць інтэграцыі Беларусі і Расеі. За ўдзел у акцыі 7 сьнежня яго мелі судзіць 30 сьнежня, але ў суд не зьявіўся сьведка, і паседжаньне перанесьлі. Будуць судзіць актывіста і за ўдзел у акцыі 20 сьнежня, паводле складзенага загадзя «прарочага» пратаколу. Дата суду пакуль не вядомая.

А Губарэвічу — пусты пратакол

Старшыня руху «За свабоду» Юрась Губарэвіч тым часам атрымаў амаль пусты пратакол, дзе пазначана толькі, хто выступіў сьведкам, але не пазначана, каго і ў чым абвінавачваюць. Палітык спытаў на Facebook, што б іншыя напісалі яму ў якасьці правапарушэньня.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG