Лінкі ўнівэрсальнага доступу

NYT: ЗША ўпершыню за 30 гадоў выслалі кітайскіх дыпляматаў


Лідэр КНР Сі Цзіньпін (зьлева) і прэзыдэнт ЗША Дональд Трамп.

Улады Злучаных Штатаў мінулай восеньню выслалі з краіны двух супрацоўнікаў пасольства Кітаю — сьцьвярджае газэта The New York Times са спасылкай на крыніцы. Аб высылцы не паведамляў ні афіцыйны Вашынгтон, ні Пэкін.

Газэта піша, што кітайскія дыпляматы былі затрыманыя на тэрыторыі вайсковай базы ў штаце Віржынія. Доступ туды без спэцыяльнага пропуску забаронены. Улады ЗША западозрылі кітайскіх грамадзян у шпіянажы і прынялі рашэньне аб іх высылцы. Гэта першы падобны інцыдэнт за больш чым 30 гадоў — з 1987 году.

Паводле дадзеных New York Times, спэцслужбы ЗША лічаць, што прынамсі адзін з высланых — афіцэр кітайскай выведкі, які працаваў пад дыпляматычным прыкрыцьцём.

Сьцьвярджаецца, што супрацоўнікі амбасады КНР спрабавалі схавацца ад амэрыканскіх вайскоўцаў, якія іх перасьледавалі, і спыніліся, толькі калі іх аўтамабілю перагарадзілі шлях.

У кастрычніку Злучаныя Штаты ўвялі абмежаваньні для кітайскіх дыпляматаў, абавязаўшы іх загадзя паведамляць аб плянах сустракацца з прадстаўнікамі мясцовых уладаў або наведваць адукацыйныя і дасьледчыя ўстановы.

Тады ў Дзярждэпартамэнце заяўлялі, што гэта адказ на падобныя абмежаваньні, уведзеныя раней у Кітаі. Газэта мяркуе, аднак, што гэта было рэакцыяй на інцыдэнт на вайсковай базе.

Пра тое, ці выслаў Кітай у адказ амэрыканскіх дыпляматаў, не паведамляецца. The New York Times са спасылкай на свае крыніцы піша, што гэтага не адбылося.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG