Лінкі ўнівэрсальнага доступу

«Трымаў расьцяжку пра голага караля». У Маскоўскім судзе Менску аднавіліся суды над удзельнікамі перадвыбарных сходаў


Маскоўскі раённы суд, ілюстрацыйнае фота

6 сьнежня ў Маскоўскім раённым судзе першымі разгледзелі справы актывістаў «Эўрапейскай Беларусі» Максіма Вінярскага, Яўгена Афнагеля і Арцёма Чарняка. Актывістаў судзілі за «Сход вольных людзей-2» і шэсьце да плошчы Незалежнасьці, якія прайшлі ў межах выбарчай кампаніі 16 лістапада.

У суд сябры «Эўрапейскай Беларусі» не зьявіліся і працэсы над імі прайшлі меней як за паўгадзіны. Максім Вінярскі і Арцём Чарняк атрымалі штрафы па 1275 рублёў. Вырак Яўгену Афнагелю пакуль невядомы, супрацоўнікі суду гэтых зьвестак не паведамляюць.

Гэтак жа хутка быў аштрафаваны актывіст зь Берасьця Андрэй Шарэнда. Яго штрафам у 1275 рублёў пакараў судзьдзя Юры Машкетаў і адразу пачаў разглядаць справу блогера з Воршы Дзьмітрыя Казлова.

Як праходзіць суд у пустой залі

«Трымаў расьцяжку „А кароль жа голы“ разам з Чарняком і Мікалайчык» — так, паводле матэрыялаў справы, 16 лістапада Дзьмітры Казлоў удзельнічаў у сходзе на плошчы Свабоды і шэсьці да Цэнтрвыбаркаму, дзе на знак пратэсту супраць «фальшывых выбараў» спалілі пасьведчаньні кандыдатаў у дэпутаты.

Падчас акцыі 16 лістапада
Падчас акцыі 16 лістапада

На вывучэньне матэрыялаў справы ў судзьдзі пайшло 10 хвілін. Сьведак-міліцыянтаў у суд так і ня выклікалі, судзьдзя толькі агучыў іх паказаньні і пайшоў раіцца. Яшчэ праз 15 хвілін ён вярнуўся і прагучала пастанова: 637 рублёў штрафу.

Працэс адклалі, бо абвінавачаны ўжо за кратамі

Пакуль ішоў працэс над Дзьмітрыем Казловым, стала вядома пра выракі іншым актывістам: Насьце Гусевай — 765 рублёў, Дзянісу Ўрбановічу — 1275 рублёў штрафу.

Пасьля абеду, у 14.15, у Маскоўскім раённым судзе будуць судзіць актывістаў Натальлю Саматыю і Андрэя Войніча.

Разгляд адміністрацыйнай справы актывіста Алеся Круткіна зь Віцебску зьбіраліся пачаць, у залю ўжо прыйшоў судзьдзя, а сакратарка на калідоры пыталася ў наведнікаў, ці ёсьць сярод іх Круткін. Разгляд справы адклалі — толькі ад праваабаронцаў «Вясны» судзьдзя Віктар Казак даведаўся, што Алесь Круткін ужо адбывае 15 сутак адміністрацыйнага арышту.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG