Лінкі ўнівэрсальнага доступу

Блогераў папярэдзілі: не хадзіць на акцыю ў Менску. Яны не хадзілі, а іх выклікалі ў суд

абноўлена

© Shutterstock

За якую, Дзяніс Красачка ня ведае дакладна: ці то за законную, ці то за тую, на якой яго не было. Таксама ў іншы суд выклікалі блогера MozgON і актывістку Насту Гусеву.

Блогер Дзяніс Красачка атрымаў SMS-позву ў суд Першамайскага раёну Менску як асоба, адносна якой вядзецца працэс за «парушэньне парадку правядзеньня мітынгаў» (ч.1 арт. 23.34 КаАП Беларусі).

Як выявілася, справу на Красачку завялі за «парушэньне парадку правядзеньня масавых мерапрыемстваў». Гаворка пра акцыю 8 лістапада — сустрэчы аўдыторыі блогера Nexta на перадвыбарчым пікеце апазыцыйных кандыдатаў.

Красачку выклікаюць у суд Першамайскага раёну Менску на раніцу 2 сьнежня. У справе фігуруе таксама імя актывісткі Вольгі Нікалайчык — яе таксама выклікаюць у суд.

Раней Красачку і іншых выклікалі ў пракуратуру, каб перад акцыяй 15 лістапада папярэдзіць пра недапушчальнасьць парушэньня закону «Аб масавых мерапрыемствах» — тады блогера пыталі і пра акцыю 8-га, але прэтэнзіяў па ёй не выстаўлялі і прызнавалі, што акцыя была санкцыянаванай.

Аднак акцыя 8 верасьня была санкцыянаваная (адбывалася ў межах пікетаў кандыдатаў у дэпутаты), кажа Красачка Свабодзе, а 15-га яго нават не было ў Менску. Пасьля абеду ён хоча паспрабаваць азнаёміцца з матэрыяламі справы ў судзе.

Красачка адзначае, што на пікеце прысутнічалі і міліцыянты ў цывільным, якія абавязаныя былі б спыніць незаконныя дзеяньні, калі б такія былі. Але акцыю не спынялі і ўдзельнікаў не папярэджвалі пра адказнасьць (хаця невядомыя ў цывільным нападалі на ўдзельнікаў, разьбілі тэхніку), з чаго Красачка робіць выснову: або пікет быў законным, або міліцыянты ня выканалі свае абавязкі.

Пікет, тлумачыць ён, быў законным: кандыдат ад Абʼяднанай грамадзянскай партыі Мікалай Маслоўскі падаваў паведамленьне пра правядзеньне перадвыбарчага пікету гарадзкім уладам (сам Красачка — таксама сябра АГП).

Цяпер жа ў справе, адзначае ён, няма запыту да гарадзкіх уладаў і іх адказу адносна санкцыянаванасьці акцыі, толькі паказаньні двух сьведкаў-міліцыянтаў.

«Яны нават не рабілі запыт, яны самі вырашылі, што гэтае мерапрыемства несанкцыянаванае, і па факце гэтага суд вырашыў узяць справу ў распрацоўку, — кажа Красачка пра міліцыянтаў і адзначае, што перадвыбарчыя пікеты тычацца выбаркамаў, а не праваахоўнікаў. — Мне вельмі цікава, як яны плянуюць гэта аргумэнтаваць».

Акрамя яго, кажа Красачка, у суд выклікалі блогера Ўладзімера Цыгановіча, які 8 верасьня быў на акцыі ў Менску, а 15-га быў на акцыі ў Гомлі. Але выклікаюць яго ня ў Гомель, а ў суд Цэнтральнага раёну Менску.

На 2 сьнежня паводле адміністрацыйнай справы выклікаюць таксама ўдзельніцу акцыі 15 лістапада Ірыну Халіп. Ёй неабходна быць а 10-й гадзіне ў РУУС Цэнтральнага раёну Менску.

Актывістка Насту Гусеву нядаўна таксама атрымала SMS-выклік у суд з тым жа артыкулам пра «парушэньне парадку правядзеньня мітынгаў».

Яе затрымалі яшчэ перад акцыяй 15 лістапада, у мітынгу яна не змагла ўзяць удзел.

Гусеву выклікалі адразу ў два суды: на 5 сьнежня ў суд Цэнтральнага раёну і на 6-га ў суд Маскоўскага.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG