Лінкі ўнівэрсальнага доступу

Радыкальная нацыяналістка з «фабрыкі троляў». Што вядома пра расейку, якую затрымлівалі ў Менску на запыт ЗША

абноўлена

Ганна Багачова

Грамадзянку Расеі Ганну Багачову, якая трапіла пад санкцыі ЗША ў справе аб умяшаньні ў амэрыканскія выбары, затрымалі ў Менску 13 кастрычніка і вызвалілі праз два дні.

Багачова — адна з 13 расейцаў, якім выставілі абвінавачаньні пасьля расьсьледаваньня спэцпракурора ЗША Робэрта Мюлера.

Як высьветліла расейская служба Радыё Свабода, Ганна Багачова добра вядомая ў колах расейскіх нацыяналістаў як «Анна Тригга». Яна была актывісткай арганізацыі «Русский образ», уваходзіла ў «групу падтрымкі» Ільлі Гарачава на судзе па справе «Баявой арганізацыі рускіх нацыяналістаў» (БОРН), па выніках якога Гарачаў атрымаў пажыцьцёвы тэрмін за арганізацыю некалькіх забойстваў.

Паводле галоўнага рэдактара выданьня «Медиазона»​ Сяргея Сьмірнова, «Рускі вобраз» быў спробай стварыць свайго роду «палітычны дах» для БОРН. Гарачаў таксама хацеў наладзіць (і збольшага змог гэта зрабіць) супрацоўніцтва з адміністрацыяй прэзыдэнта Расеі.

«Анна Тригга» (справа)
«Анна Тригга» (справа)

Таксама паведамляецца, што яна была знаёмая з Марыяй Буцінай, якая таксама трапіла ў поле зроку ФБР падчас расьсьледаваньня справы аб умяшаньні Расеі ў амэрыканскія выбары і пасьля пагадненьня са следзтвам была асуджаная ў ЗША да аднаго з паловай гадоў пазбаўленьня волі за дзейнасьць у якасьці незарегістраванага агента замежнага ўраду.

Вядома, што ў 2011 годзе Ганна Багачова выступала на моладзевым форуме ў Беларусі зь лекцыяй «пра інфармацыйную бясьпеку і сацыяльныя сеткі». Яна фігуравала на фота ў Інстаграме былога актывіста арганізацыі «Русский образ» Яўгена Валяева. Але ўжо пасьля гэтай публікацыі, фота з Інстаграму зьнікла.

На іншым фота, апублікаваным тэлеграм-каналам «Белорусский порядок», разам з Валеевым і Багачовай ёсьць і Сяргей Лушч — цяперашні кіраўнік зарэгістраванага ў Беларусі грамадзкага аб’яднаньня «Русь молодая». Гэта створаная ў 2005 годзе праўрадавая расейская моладзевая арганізацыя, якая сваёй ідэалёгіяй называе «грамадзянскі нацыяналізм».

Сяргей Лушч адмовіўся адказваць на пытаньні Свабоды пра Багачову, сказаўшы, што знаходзіцца ў камандзіроўцы.

Фігурантка амэрыканскага санкцыйнага сьпісу

У лютым 2018 году расейскія СМІ, а таксама Радыё Свабода падрабязна распавядалі пра людзей з санкцыйнага сьпісу. Як вынікае з абвінаваўчага заключэньня, многія зь іх наведвалі ЗША напярэдадні выбараў, каб сабраць інфармацыю і завесьці сувязі, якія павінныя былі дапамагчы ў стварэньні фэйкавых акаўнтаў і груп у сацсетках для палярызацыі амэрыканскага грамадзтва і наступнага ўплыву на амэрыканскі палітычны парадак дня.

Ці не найменш інфармацыі журналістам удалося атрымаць пра супрацоўніцу «Агенцтва інтэрнэт-дасьледаваньняў» Ганну Багачову. Паводле Міністэрства юстыцыі ЗША, яна працавала як мінімум з красавіка па ліпень 2014 году ў так званым «перакладчыцкім праекце».

Багачова разам зь іншай супрацоўніцай агенцтва, Аляксандрай Крыловай, наведала дзевяць амэрыканскіх штатаў, каб сабраць дадзеныя для будучых апэрацый «фабрыкі троляў» у ЗША. Пры атрыманьні візы яна паказала несапраўдную мэту паездкі. Ужо знаходзячыся ў краіне, купіла відэакамэры, некалькі сім-карт і аднаразовых тэлефонаў, абмяркоўвала з Крыловай «шляхі адыходу» для сябе і сваіх калегаў на выпадак правалу місіі.

Як высьветлілі журналісты «Новай газэты», ураджэнка Стаўрапольскага краю Ганна Багачова вучылася ў Санкт-Пецярбургу ў Нацыянальным дасьледчым унівэрсытэце інфармацыйных тэхналёгій, мэханікі і оптыкі і валодала разам з былым камісарам пракрамлёўскага руху «Нашы» Міхаілам Пацепкіным кампаніяй «АйТи Дебаггер», якая займалася «прасоўваньнем сайтаў і распрацоўкай PR-кампаній».

Чаму Ганна Багачова са «сьпісу Мюлера» — гэта «Анна Тригга»?

Пра тое, што «Анна Тригга» можа быць той самай Ганнай Багачовай з санкцыйнага сьпісу ЗША, удалося даведацца дзякуючы выдаленаму акаўнту Тригги ў сацыяльнай сетцы «Укантакце» — vk.com/trigga88. Згадку гэтага акаўнту як акаўнту «Тригги» знайшлі ў камэнтарах да навіны ад 13 траўня 2013 года на сайце «Правые новости» пра абвяшчэньне Ільлі Гарачава ў вышук па справе БОРН. У камэнтары карыстальнік пад нікам KAMPF18 піша пра «Триггу» як пра адну з актывістак «Руского порядка», зьвязаную з Гарачавым.

Нягледзячы на тое што цяпер рахунак trigga88 выдалены, на сайце Wayback Machine захавалася яго копія па стане на 1 лютага 2012 году.

Як вынікае з гэтай захаванай копіі, рахунак trigga88 належыць карыстальніку Anna Trigga, які нарадзіўся 13 сакавіка 1988 году. Такая ж дата нараджэньня пазначаная насупраць прозьвішча Ганны Багачовай у санкцыйным сьпісе Міністэрства фінансаў ЗША. Як выявілася, рахунак Багачовай-«Тригги» быў ня выдалены, а перайменаваны: па адрасе vk.com/id5146266 адкрываецца старонка карыстальніка «Анна Владиславова» (імя Багачовай і яе імя па бацьку, пераробленая ў прозьвішча). Профіль зачынены ад староньніх вачэй, адзіная даступная ў ім інфармацыя — аватар профілю (Энтані Гопкінс у ролі Ганібала Лектара) і дзень нараджэньня, усё тое ж 13 сакавіка (але ўжо бяз году).

З праграмістак у нацыяналісткі

Ганна Багачова нарадзілася ў Стаўрапальскім краі, але ў сярэдзіне 2000-х апынулася ў Санкт-Пецярбургу, дзе паступіла ў Нацыянальны дасьледчы ўнівэрсытэт інфармацыйных тэхналёгій, мэханікі і оптыкі — адзін з вядучых расейскіх ВНУ, студэнты якога ня раз рабіліся пераможцамі міжнародных спаборніцтваў па праграмаваньні.

Праграмаваньню вучылася і Багачова, відавочна, досыць рупліва: у 2010 годзе, будучы студэнткай 6-га курса факультэта кампутарных тэхналёгій і кіраваньня, яна сярод яшчэ 20 студэнтаў унівэрсытэту атрымала прэстыжную Патанінскую стыпэндыю. У 2013-м, ужо будучы асьпіранткай, была рэкамэндаваная сваім ВНУ на стыпэндыю ураду РФ па прыярытэтных кірунках.

У красавіку 2014 году Багачова зарэгістравала зь Міхаілам Пацепкіным згаданую вышэй кампанію «Ай Ти Дебагер», а ў чэрвені таго ж году Багачова разам са сваёй калегай па новай працы Аляксандрай Крыловай, яшчэ адной фігуранткай сьпісу Мюлера, ужо накіравалася ў першую паездку па ЗША «з мэтай збору разьведадзеных» для «Агенцтва інтэрнэт-дасьледаваньняў» Яўгенія Прыгожына.

Вядомай дзяячкай пецярбурскіх нацыяналістычных колаў, у якіх яна добра вядомая пад псэўданімам «Анна Тригга», Багачова стала прыкладна ў адзін час з пачаткам сваёй вучобы ва ўнівэрсытэце.

Галоўны рэдактар выданьня «Ридус» Андрэй Гулюцін, які ў сярэдзіне 2000-х уваходзіў у рэдкалегію часопісу «Рускі вобраз», адказаў Радыё Свабода на пытаньне, як яна трапіла ў гэтыя колы:

«Спорт, каляфутбольныя колы, музыка — усё перадавыя носьбіты гэтых ідэй у юнацтве належаць да рознага кшталту левакоў або да правых. У тыя далёкія гады, у 90-х — нулявых, калі ты не хацеў быць у колах наркаманаў, але хацеў быць часткай нефармальнага асяродзьдзя, а не гапаты, ты абавязкова трапляў у тое самае асяродзьдзе. Усё проста».

Крыніца Радыё Свабода, якая пажадала захаваць ананімнасьць, распавяла, што на працу ў «Агенцтве інтэрнэт-дасьледаваньняў» Багачова прыйшла пад ціскам ФСБ — пасьля ўдзелу «Тригги» ў працы «Рускага ладу» і іншых нацыяналістычных праектаў. Пацьвердзіць гэтую інфармацыю ў іншых крыніцах Свабодзе пакуль не ўдалося.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG