Дэфіцыт рэспубліканскага бюджэту ў 2020 годзе можа скласьці каля 1 млрд беларускіх рублёў, паведаміў журналістам міністар фінансаў Беларусі Максім Ермаловіч, піша БелаПАН.
«Дзесьці ў раёне 1% да ВУП плянуецца дэфіцыт. Гэта да 1 млрд рублёў», — сказаў Ермаловіч 10 кастрычніка ў Палаце прадстаўнікоў.
Паводле міністра фінансаў, дэфіцыт бюджэту скарацілі з 1,3% да ВУП да 1%, «усталяваўшы больш напружанае патрабаваньне да пералічэньня часткі прыбытку дзяржаўных прадпрыемстваў у бюджэт».
Раней Лукашэнка адправіў увесь пакет прагнозных дакумэнтаў ураду на дапрацоўку, бо «палічыў пляны ўраду недастаткова напружанымі».
Праект бюджэту на 2020 год плянуюць накіраваць у Палату прадстаўнікоў да канца кастрычніка. У рамках бюджэту, паводле Ермаловіча, вызначаныя ўнутраныя і зьнешнія крыніцы пагашэньня зьнешняга доўгу, які складае 3,5 млрд даляраў. 75% гэтай сумы будуць запазычваць на зьнешніх рынках.
Як адзначыў Ермаловіч, істотны ўплыў на фармаваньне бюджэту аказвае падатковы манэўр у расейскай нафтавай галіне. Страты эканомікі Беларусі ад расейскага «падатковага манэўру» ў 2020 годзе складуць каля 400 млн даляраў.
«На наступны год страты будуць 800 млн даляраў з улікам назапашаных 400 млн у гэтым годзе, яшчэ 400 млн на наступны. 800 млн — гэта сумарна для эканомікі», — сказаў ён.
На пытаньне, ці ёсьць нейкія зрухі ў перамовах з Расеяй па кампэнсацыі стратаў, Ермаловіч сказаў: «Мы пакуль у працэсе».
Што важна ведаць пра расейскі падатковы манэўр
Нафтавы падатковы манэўр у Расеі — паступовая замена спагнаньня экспартнага мыта падаткам на здабычу карысных выкапняў (ПЗКВ). Экспартнае мыта будзе зьмяншацца адначасова з павелічэньнем ПЗКВ.
- Расея пачала рэалізацыю падатковага манэўра зь 2019 году.
- Да канца 2018 году экспарт сырой нафты ў Расеі абкладаўся экспартным мытам у памеры 30% ад цаны. Мыта не спаганялася з паставак на ўнутрырасейскі рынак і ў межах квоты ў Беларусь.
- У 2017-2018 гадах квота на пастаўкі бязмытнай расейскай нафты для Беларусі складала 24 млн тон (18 млн тон перапрацоўвалі беларускаія НПЗ, 6 млн тон ішлі на рээкспарт).
- Беларусь мела права абкладаць экспартным мытам свае нафтапрадукты, вырабленыя з расейскай бязмытнай нафты, якія прадавала ў трэція краіны. Беларускае мыта ішло ў беларускі бюджэт.
Страты і кампэнсацыя
- У сьнежні 2018 г. у адміністрацыі Лукашэнкі сьцьвярджалі, што за 3 апошнія гады Беларусь недаатрымала $3,6 млрд, а за наступныя 4 гады недаатрымае $11 млрд пры найгоршым разьвіцьці падзей.
- Паводле падлікаў рэйтынгавага агенцтва Fitch, наўпроставыя страты беларускай эканомікі складуць $10,6 млрд цягам 2019–2024 гг.
- Дырэктар дасьледніцкага цэнтру ІПМ Аляксандар Чубрык падлічыў, што страты для бюджэту Беларусі ў 2019 годзе склалі $272,3 млн.
- У кастрычніку 2018 Расея абяцала пералічыць у бюджэт Беларусі каля $405 млн у якасьці аплаты экспартнага мыта за нафту. Пазьней у кампэнсацыі адмовілі.
- 18 сьнежня 2019 расейскі партал РБК паведаміў са спасылкай на свае крыніцы, што Расея кампэнсуе Беларусі страты ад манэўра праз зваротны акцыз для беларускіх НПЗ. Суму субсыдыяў ацанілі ў $1,5 млрд. Афіцыйнага пацьвярджэньня гэтай інфармацыі не было.
