Лінкі ўнівэрсальнага доступу

Дзьве сьмерці на прадпрыемстве ў Чавусах. Што адбылося?


4 ліпеня на хлебазаводзе ў Чавусах (Магілёўская вобласьць) загінула 52-гадовая жанчына, траўмаваная цестамеснай машынаю. Празь пяць дзён стала вядома пра сьмерць яшчэ аднаго супрацоўніка. Што здарылася?

«Пасьля допыту трэсьліся рукі»

Свабода высьветліла, што работніка звалі Ўладзімерам С. Ён працаваў у адной зьмене зь нябожчыцай Тамарай Б. Знаёмыя характарызуюць Уладзімера як спакойнага, ураўнаважанага чалавека. Кажуць, што пасьля допыту сьледчых ён быў «зьбялелы, як сьмерць, і ў яго трэсьліся рукі». На пытаньні, што зь ім, не адказваў.

9 чэрвеня стала вядома пра ягоную сьмерць. Родзічы пакуль устрымаліся ад размовы з журналістам.

Сьледчы камітэт: дзьве сьмерці не зьвязаныя

«49-гадовы мужчына першым аказваў дапамогу жанчыне, якая загінула. З гэтай прычыны ён апытваўся ў межах праверкі па факце яе сьмерці, — сказала Свабодзе прадстаўніца Сьледчага камітэту Юлія Ганчарова. — Загінулы аніяк не адказваў за абслугоўваньне цестамеснага абсталяваньня і ня нёс аніякай адказнасьці за ягоную спраўнасьць».

Цестамесная машына на хлебазаводзе ў Чавусах
Цестамесная машына на хлебазаводзе ў Чавусах

Раней Сьледчы камітэт паведаміў, што работніца райспажыўтаварыства загінула на працоўным месцы а 22 гадзіне 4 ліпеня.

«Сьледча-апэратыўнай групай праведзены агляд месца здарэньня, вынята дакумэнтацыя па ахове працы і тэхніцы бясьпекі, апытаныя калегі загінулай. Дзеля высьвятленьня прычыны сьмерці прызначана судова-мэдычная экспэртыза», — гаварылася ў паведамленьні Сьледчага камітэту.

Выдаткі на пахаваньне работнікаў аплаціў працадаўца

Старшыня праўленьня Чавускага райспажыўтаварыства Мікалай Глушкевіч сказаў, што прычыны сьмерці работнікаў высьвятляюць сьледчыя органы.

«Заключэньняў ніякіх я даваць не магу. Як толькі Сьледчы камітэт усе паперы дасьць, то тады я буду валодаць інфармацыяй», — кажа Мікалай Глушкевіч.

Паводле яго, выдаткі на пахаваньне абодвух работнікаў узяло на сябе райспажыўтаварыства. Загінулыя адпрацавалі на прадпрыемстве па некалькі дзясяткаў гадоў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG