Актывісткі ініцыятывы «Маці 328» плянуюць прыпыніць галадоўку ў чаканьні сустрэчы з кіраўніцай адміністрацыі прэзыдэнта Натальляй Качанавай, паведаміла БелаПАН адна з удзельніц акцыі пратэсту Ала Берналь.
Пасьля сустрэчы некалькіх актывістак «Маці 328» з намесьнікам кіраўніка адміністрацыі Мікалаем Снапковым 27 чэрвеня жанчынам паабяцалі, што сустрэча з Качанавай павінна адбыцца да 10 ліпеня.
«Таму 3 ліпеня плянуем прыпыніць галадоўку. Будзем чакаць сустрэчы з Качанавай і глядзець, што і як яна вырашыць. Калі нашы патрабаваньні будуць задаволеныя, то мы спыняем галадоўку, калі не — аднаўляем», — патлумачыла Ала Берналь.
На сёньня галадоўку па-ранейшаму трымаюць чацьвёра жанчын, іх самаадчуваньне ўвесь час пагаршаецца. «Нас штодня наведваюць мэдыкі і мы штодня падпісваем адмову ад шпіталізацыі», — распавяла Берналь. 2 ліпеня галадоўніцы пройдуць мэдыцынскае абсьледаваньне ў паліклініцы.
Што важна ведаць пра галадоўку «Маці 328»
11 чэрвеня актывісткі руху «Маці 328», дзеці якіх адбываюць пакараньне паводле наркатычнага артыкулу, абвясьцілі галадоўку.
Удзельнікі галадоўкі патрабуюць
- Сустрэчы з Аляксандрам Лукашэнкам;
- Гуманізацыі антынаркатычнага заканадаўства;
- Перагляду спраў па 328-м артыкуле;
- Прыбраць з закону паняцьце «асабліва небясьпечныя наркотыкі»:
- Адстаўкі старшыні Вярхоўнага суду Валянціна Сукалы;
- Амністыі для непаўналетніх;
- Роспуску Палаты прадстаўнікоў Нацыянальнага cходу.
13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады.
У красавіку-траўні 2018 годe актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе. Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкулу (ад 5 да 25 гадоў пазбаўленьня волі), а таксама зьменаў у заканадаўства.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў