Аляксандар Лукашэнка 11 чэрвеня прызначыў новых міністраў аховы здароўя і ўнутраных спраў, а таксама новага намесьніка сакратара Савету бясьпекі замест арыштаванага.
На гэтым сьпіс прызначэньняў не завяршаецца.
Апальнага Воўка — на МТЗ
Новым генэральным дырэктарам Менскага трактарнага заводу Лукашэнка прызначыў Віталя Воўка — былога міністра прамысловасьці.
Воўк адразу пасьля ўнівэрсытэту пайшоў на Менскі аўтамабільны завод, працаваў там з 1984 году па 2001-ы. Далей 5 гадоў быў генэральным дырэктарам кампаній «Юкола-Сэрвіс» і «Юкола-мотарс», затым 4 гады — намесьнікам дырэктара Менскага заводу колавых цягачоў, тры гады — генэральным дырэктарам. Са сьнежня 2014 году па жнівень 2018-га быў міністрам прамысловасьці.
У жніўні 2018 году Лукашэнка накрычаў на ўрад пасьля візыту ў Аршанскі раён, зьняў з пасадаў міністра архітэктуры і будаўніцтва і міністра прамысловасьці, пагражаў Воўку турмой або накіраваньнем на Аршанскі інструмэнтальны завод.
Але замест турмы звольнены міністар прамысловасьці аказаўся ў верасьні 2018 году ў прэзыдэнцкіх памочніках. Лукашэнка тлумачыў, што «проста шкада Воўка як кіраўніка прадпрыемства», а то «нямала ў народзе людзей, якія рукі паціраюць: чыноўніку галаву адсячы б, павесіць каго-небудзь…» На пасадзе памочніка Воўк не прабыў і году.
«У цябе нават зазору як такога няма, толькі наперад, — сказаў Лукашэнка Воўку 11 чэрвеня, даўшы заданьне разьвіваць МТЗ. — Не сумняюся, ты ведаеш, што там трэба рабіць. Калі зможаш разгарнуцца і людзей разгарнуць... Сам ты разгорнесься. Людзей трэба арганізаваць».
Што з папярэднім дырэктарам МТЗ Фёдарам Дамаценкам, не паведамляецца. Ён кіраваў заводам з 2014 году, яшчэ тыдзень таму разважаў пра справы заводу. Пра магчымы сыход ён казаў, але гэта быў сыход МТЗ з рынку Вэнэсуэлы — і Дамаценка казаў, што гэта было б заўчасна, бо рынак добры. Хоць чуткі пра ягонае звальненьне і замену на Воўка хадзілі з канца траўня.
Дзяржкантроль і выканкамы
Таксама Лукашэнка прызначыў 11 чэрвеня Васіля Герасімава і Дзьмітрыя Баско адпаведна першым намесьнікам і намесьнікам старшыні Камітэту дзяржаўнага кантролю, Ілону Лядніцкую — сябрам праўленьня Нацыянальнага банку.
Ён даў згоду на прызначэньне новых старшыняў Магілёўскага (Сяргей Земчанок) і Лёзьненскага (Алег Чыкіда) райвыканкамаў, старшыні адміністрацыі Ленінскага раёну Магілёва (Аляксей Багайчук), намесьніка старшыні Магілёўскага аблвыканкаму (Руслан Страхар) і сябра Берасьцейскага аблвыканкаму (Дзьмітры Гарадзецкі).
50 авечак і 3/10 авечкі
У час прызначэньняў кіраўнікоў мясцовай улады Лукашэнка пачаў разважаць пра запатрабаваную на рынку прадукцыю – і вырашыў, як перадае ягоная прэс-служба, што ў Беларусі можна было б гадаваць авечак.
«Мне ўрад піша — ну проста брыдка чытаць, — казаў ён. — Добра б я не разумеў у гэтым нічога: можна было б адпіску гэтую цярпець. Да 2025 году яны дададуць 133% авечак. Гэта значыць, авечкагадоўля будзе ў нас, мы будзем авечак разводзіць. Гэта воўна, гэта аўчына, гэта бараніна. Нібы на рынку запатрабавана. Ну, карацей, будзем разводзіць гэтых авечак.
Так, а што такое 33% да 2025 году? Гэта сёньня адна авечка, а заўтра будзе адна і тры дзясятыя авечкі. Ну што гэта за тэмпы?»
Лукашэнка заявіў, што асабіста пераканаўся ў тым, што гадаваць авечак не складана: маўляў, «у мяне іх, напэўна, штук 50 — раздаю людзям, падзець няма куды».
«Якія там выдаткі? — расказваў Лукашэнка мясцовым уладам пра гадоўлю авечак. — Раніцай пойдзеш, накосіш за паўгадзіны травы, завязеш — і ім досыць. На пашу ходзяць ці ў лясок запусьціў іх, яны ў гэтым лесе сядзяць у сьпякоту».
Такі прагноз надвор’я непатрэбны
У развагах пра ўраджаі Лукашэнка згадаў і тэму прагнозаў надвор’я – заявіў, што Белгідрамэтцэнтар не спраўляецца з абавязкамі ў поўнай меры.
«Зь імі трэба нешта рабіць: іх трэба ці разганяць, ці прыводзіць у прытомнасьць, — сказаў ён пра мэтэаролягаў. — У лепшым выпадку ў нейкі дзень на 50–70% дакладнасьць прагнозу надвор'я. Нам такі Гідраметцэнтар не патрэбны.
Я ўжо арыентуюся на вайскоўцаў, якія бачаць у рэальным часе надворʼе, падкажуць, дзе ідуць дажджы па рэспубліцы і што будзе ў бліжэйшыя 12 гадзін. Амаль на 100% даюць дакладны прагноз, праўда, кароткі. Мы павінны ведаць, што адбываецца, што будзе заўтра, пасьлязаўтра, каб арыентавацца».
