Дырэктар «Арт-сядзібы» Алесь Сьнег запусьціў на сэрвісе MolaMola збор грошай на кампанію #МаяМова — за тое, каб на будучым перапісе насельніцтва беларусы пазначалі роднай мовай беларускую.
Сабраць плянуецца 3000 рублёў, якія пойдуць на прома-прадукцыю (паштоўкі і стыкеры), канцэрты і імпрэзы ў Менску і рэгіёнах, выданьне песьняў і відэа па-беларуску ды іншыя ідэі.
«Адказ „беларуская“ на пытаньні перапісчыкаў аб роднай мове і мове штодзённага ўжытку мае ня толькі сымбалічнае, але і практычнае значэньне, — гаворыцца ў апісаньні праекту. — Ад колькасьці людзей, якія ў адказах назавуць беларускую мову, будзе залежаць далейшая палітыка дзяржавы. Адказам „беларуская“ вы станоўча паўплываеце на яе».
Перапіс насельніцтва Беларусі пройдзе ў верасьні 2019 году. Яго будуць праводзіць не праз інтэрнэт (гэта толькі опцыя, не асноўны шлях), а па-старому: сіламі перапісчыкаў, якія будуць абыходзіць дамы і кватэры. Але для перапісчыкаў закупяць пляншэты за 3 млн рублёў. Фармулёўка моўных пытаньняў ня зьменіцца.
Паводле перапісу 2009 году, беларускую мову назвалі роднай 53,2% насельніцтва; сярод гараджан па-беларуску гаварылі 11,3%, сярод жыхароў вёскі — 58.7%.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў