Лінкі ўнівэрсальнага доступу

Жонка іранца, якога высылаюць зь Беларусі, рабіла спробу суіцыду, яна ў шпіталі ў Навінках


Мэхрдад Джамшыдыян, 2015 год

У судзе Маскоўскага раёну Менску 15 красавіка разглядаюць скаргу на рашэньне аб высылцы ў Іран Мэхрдада Джамшыдыяна, якому на радзіме пагражае сьмяротная кара.

Мэхрдад Джамшыдыян шмат гадоў таму ўцёк з Ірану ад перасьледу з палітычных прычынаў, жыве ў Беларусі з 1993 году. Мае ў Менску сям’ю: жонку-беларуску і траіх дзяцей. Прасіў беларускага грамадзянства, але яму адмовілі.

У Іране Джамшыдыяну пагражае сьмяротнае пакараньне. З 2009 году ўлады Ірану патрабуюць ягонай выдачы, бо падазраюць у датычнасьці да забойства, што іранец адмаўляе (у час забойства яго не было ў краіне, сьцьвярджае Джамшыдыян). Апрача таго, у Іране яго чакае абвінавачаньне ў вераадступніцтве, бо ў Беларусі ён перайшоў з ісламу ў хрысьціянства, а гэта ў Іране лічыцца злачынствам.

На суд прыйшла дачка Мэхрдада Джамшыдыяна Дзіяна. Яна паведаміла карэспандэнту Свабоды, што ў красавіку сытуацыя ў іхнай сям’і стала яшчэ горшай — маці, жонка Мэхрдада, спрабавала ўчыніць суіцыд.

«Наша мама Алена цяпер ляжыць ў псыхіятрычным шпіталі ў Навінках, яна назіраецца пасьля спробы суіцыду, — расказала яна. — Яе выратавалі, але што будзе далей, ніхто ня ведае. Гэта адбылося ў пачатку красавіка. І маральных, і матэрыяльных сілаў у нас усіх сапраўды ўжо не засталося.

Раней мама перанесла анкалёгію, яна вельмі хворая, і калі тату арыштавалі, мы прасілі, каб яму далі зь ёй сустрэцца, ёй вельмі была патрэбна гэтая падтрымка. Ніводнага спатканьня не дазволілі. І на час вырашэньня пытаньня ў судзе яго маглі адпусьціць, гэта закон дазваляе, але таксама не адпусьцілі».

Суд пастанавіў адкласьці разгляд скаргі да 19 красавіка праз «неабходнасьць запрасіць дадатковую інфармацыю».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG