Лінкі ўнівэрсальнага доступу

Расейскую сацсетку «Аднаклясьнікі» пераклалі на беларускую мову


«Шапка» сайту OK.ru ў беларускай вэрсіі

Беларуская мова стала толькі 15-й у сьпісе моваў OK.ru, зьявілася там на 11 гадоў пазьней, чым «УКантакце».

Сацыяльная сетка «Аднаклясьнікі», якая належыць расейскай Mail.ru Group, запусьціла беларускую вэрсію інтэрфэйсу (афіцыйным правапісам). Паведамленьне з прапановай пераключыць мову прыйшло карыстальнікам зь Беларусі 28 сакавіка.

На сайце можна таксама пераключыць мову кнопкай у правым верхнім кутку старонкі. На мабільнай вэрсіі або ў праграмах для смартфонаў трэба зайсьці ў налады і адшукаць пункт «Зьмяніць мову». Або можна скарыстацца гэтай спасылкай.

Пераклад закрануў ня толькі інтэрфэйс. Напрыклад, пошук па падарунках цяпер разумее і беларускія словы, а «шапка» сайту дапоўненая ў беларускай вэрсіі арнамэнтам. Не пераклалі гульні, старонку дапамогі і чамусьці назву сацсеткі ў «шапцы» сайту.

У канкурэнта «Аднаклясьнікаў», расейскай сацсетцы «ЎКантакце», якой цяпер таксама валодае Mail.ru, беларуская мова зьявілася ў 2008 годзе — першы пераклад быў зроблены самімі карыстальнікамі з ужываньнем клясычнага правапісу (тарашкевіцы). Праз 6 гадоў зьявіўся і пераклад ВК на афіцыйны правапіс.

А запуск саміх сацсетак ВК і ОК быў амаль адначасовы: спачатку «Аднаклясьнікі» ў сакавіку 2006 году, затым «УКантакце» ў кастрычніку 2006-га.

Пры гэтым Беларусь — другая пасьля Расеі ў колькасьці актыўных карыстальнікаў «Аднаклясьнікаў». Паводле самой сацсеткі, штомесячная аўдыторыя зь Беларусі складае 2,7 млн карыстальнікаў, а ўсяго сваёй краінай пазначылі Беларусь 7,35 млн карыстальнікаў (на ВК — 4,97 млн).

«Аднаклясьнікі» назвалі самай папулярнай сацсеткай у Беларусі ў дасьледаваньні Інфармацыйна-аналіытчнага цэнтру пры прэзыдэнце — у яе заходзілі 68,8% апытаных.

Праўда, паводле апытаньня кампаніі Online Market Intellegence, праведзенага ў мінулым кастрычніку, «Аднаклясьнікі» толькі трэція па папулярнасьці ў Беларусі: 90% апытаных карысталіся ВК, 85% — Youtube і толькі 60% — ОК. Акрамя таго, 59% карысталіся Instagram, і 55% — Facebook. Таксама 93% карысталіся мэсэнджарам Viber, 62% — Skype, 41% — WhatsApp і 35% — Telegram.

У рэйтынгу Alexa «Аднаклясьнікі» ў Беларусі толькі на 9-м месцы па працягласьці часу, праведзенага людзьмі на сайце — пасьля Youtube, Google.com, VK, Yandex, Mail.ru, Tut.by, Onliner.by і Google.by.

Старонка Радыё Свабода на «Аднаклясьніках» >>>

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG