Лінкі ўнівэрсальнага доступу

У Менску прэзэнтавалі ўкраінскі тэлеканал UATV


У Менску адбылася прэзэнтацыя ўкраінскага дзяржаўнага тэлеканалу UATV, які напачатку гэтага году атрымаў дазвол на трансьляцыю ў Беларусі. Канал створаны Ўкраінай для замежнай аўдыторыі і ўжо зьявіўся ў некаторых беларускіх кабэльных сетках — праўда, ніводзін з найбуйнейшых апэратараў у свае пакеты яго не ўключыў.

На імпрэзу, якая прайшла ў будынку амбасады Ўкраіны ў Беларусі, былі запрошаныя дырэктарка тэлеканалу Людміла Беразоўская і дзяржаўны сакратар міністэрства інфармацыйнай палітыкі Ўкраіны Арцём Бідэнка. Мадэратарам выступаў амбасадар Украіны ў Беларусі Ігар Кізім.

Ад беларускага боку былі прадстаўнікі міністэрстваў інфармацыі і замежных справаў, кіраўнікі кабэльных апэратараў, дэпутатка Палаты прадстаўнікоў Алена Анісім.

Ігар Кізім. Амбасадар Украіны
Ігар Кізім. Амбасадар Украіны

«Самае складанае — зрабіць першы крок насустрач адзін аднаму. І вось нарэшце ён зроблены, — адзначыў Ігар Кізім у вітальным слове. — Я шчасьлівы, што цяпер беларускія гледачы маюць магчымасьць глядзець праўдзівыя, нецэнзураваныя навіны з суседняй краіны, а ня тое, чым нашпігоўваюць іх расейскія прапагандысты. Украінцы і беларусы павінны разумець адзін аднаго глыбей, без ранейшага налёту савецкасьці».

Зь яго словаў, значэньне «вольнай трыбуны» асабліва важнае на фоне расейскай агрэсіі супраць Украіны, каб гледачы мелі не аднабаковую, а ўзважаную інфармацыю.

Арцём Бідэнка нагадаў, што цягам апошніх чатырох гадоў была праведзеная вялізная праца, каб тэлеканал зьявіўся ў Беларусі, і выказаў спадзеў, што гэта паспрыяе ўмацаваньню двухбаковых сувязяў.

Дзяржаўны сакратар міністэрства інфармацыйнай палітыкі Ўкраіны Арцём Бідэнка
Дзяржаўны сакратар міністэрства інфармацыйнай палітыкі Ўкраіны Арцём Бідэнка

«Розныя паўставалі праблемы на гэтым шляху, але сёньня мы можам канстатаваць, што высілкі прынесьлі рэальны плён, — сказаў украінскі службовец. — Цяпер беларусы і ўкраінцы атрымалі магчымасьць быць у тэлеэфіры без пасярэднікаў — твар у твар».

Людміла Беразоўская ўдакладніла, што кантэнт каналу надзвычай разнастайны і задаволіць самыя розныя пласты гледачоў — ад палітычна актыўных грамадзянаў да аматараў спорту.

Дырэктарка тэлеканалу UATV Людміла Беразоўская
Дырэктарка тэлеканалу UATV Людміла Беразоўская

«Ненавінавы кантэнт вельмі разнастайны: тут і ўкраінскія рэформы, і турыстычныя маршруты па малавядомых месцах, і лябірынты гісторыі, і праграма пра Ўзброеныя сілы, і для аматараў нацыянальнай кухні. Абсалютна на кожны густ», — пералічыла кіраўніца каналу.

Пры гэтым яна дадала, што пытаньне адкрыцьця карэспандэнцкага пункту ў Менску пакуль не разглядаецца, але навіны зь Беларусі апэратыўна выдаюцца ў эфір. Таксама ў размове зь ёй міністар інфармацыі Аляксандар Карлюкевіч паабяцаў максымальнае спрыяньне ва ўсіх сфэрах.

Людміла Беразоўская паведаміла, што паступова да UATV будуць далучацца іншыя «жанравыя» каналы, якія пачнуць паказваць свае праграмы ў Беларусі. Сярод іншых свае заяўкі падалі такія вядомыя, як «1+1» і «Квартал», а таксама забаўляльныя Star Cinema і Star Family.

У сваю чаргу прадстаўнік Мінінфармацыі Беларусі Ўладзімер Рабаволаў запэўніў, што краіна адкрытая для таго, каб беларускія спажыўцы атрымлівалі інфармацыю «зь першых рук».

Кіраўніцтва дзьвюх дзяржаваў узгадняла трансьляцыю ўкраінскага дзяржаўнага тэлеканалу ў Беларусі пачынаючы ад 2014 году. Тады Аляксандар Лукашэнка і Пятро Парашэнка дамовіліся «абмяняцца» тэлепрадукцыяй. Але калі «Беларусь 24» неўзабаве прыйшла да ўкраінскага гледача, то дазволу зь Беларусі для UATV давялося чакаць ажно 5 гадоў.

У Беларусі дзейнічаюць амаль паўтары сотні кабэльных тэлеапэратараў, якія абслугоўваюць 3,5 мільёна абанэнтаў. Але лідэры рынку пакуль ня выявілі цікавасьці да ўкраінскага тэлепрадукту.

Як удакладніў Вадзім Ціхановіч, дырэктар кампаніі «Навігатар-TV», якая зьяўляецца афіцыйным дыстрыбутарам UATV на тэрыторыі Беларусі, на гэты момант падпісана блізу двух дзясяткаў дамоваў, пераважная большасьць — гэта апэратары з памежных Берасьцейскай і Гомельскай абласьцей. Некалькі ўжо пачалі трансьляцыю, сярод іх «Эфір», «СЭТ», «Німфадора».

Кіраўнік фірмы «Эфір» Сяргей Коўган
Кіраўнік фірмы «Эфір» Сяргей Коўган

«Міжкультурная прастора паміж Беларусьсю і Ўкраінай павінна пашырацца, — зазначыў кіраўнік фірмы „Эфір“ Сяргей Коўган, які першым з калегаў пачаў трансьляцыю ўкраінскага тэлеканалу. — Пагатоў узровень тэлеканалу вельмі высокі, ён не саступае прадукцыі, якую вырабляюць міжнародныя канцэрны. Гэта выдатная магчымасьць умацоўваць нашыя культурныя сувязі».

Пераважную долю тэлевізійнага кантэнту ў Беларусі па-ранейшаму займаюць расейскія каналы.

UATV — украінскі дзяржаўны тэлеканал замежнага вяшчаньня, мае эфіры на ўкраінскай, расейскай, крымскататарскай, ангельскай і арабскай мовах. 24 студзеня міністар інфармацыі Беларусі Аляксандар Карлюкевіч падпісаў загад, якім на бліжэйшыя тры гады дазволіў каналу распаўсюджвацца на тэрыторыі Беларусі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG