Лінкі ўнівэрсальнага доступу

Крэмль раскрытыкаваў заяву МЗС Беларусі. Бабіч: такое не ўпершыню


Амбасадар Расеі ў Беларусі Міхаіл Бабіч і Аляксандар Лукашэнка, верасень 2018

У Маскве пракамэнтавалі выказваньні прэс-сакратара МЗС Беларусі, які раскрытыкаваў амбасадара Расеі ў Менску Міхаіла Бабіча.

«Мы азнаёміліся з рэакцыяй прэс-сакратара міністэрства замежных справаў Беларусі, і я б сказаў, што мы маем права разьлічваць на больш паважлівае стаўленьне да амбасадара», — заявіў РИА Новости статс-сакратар, намесьнік кіраўніка МЗС Расеі Грыгорый Карасін.

Перад гэтым Карасін сустрэўся з паслом Беларусі ў Расеі Ўладзімерам Сямашкам. Паводле МЗС Расіі, бакі «абмяняліся думкамі аб актуальных пытаньнях расейска-беларускіх дачыненьняў».

Тым часам Михаіл Бабіч ужо пасьпеў пракамэнтаваць сытуацыю ў інтэрвію тэлеканалу «Россия 24».

«Гэта выпад далёка ня першы, чулі мы выпады і больш вострыя, больш рэзкія. Я ўпэўнены, што як працавалі, так і будзем працаваць», — сказаў ён.

Звадка паміж паслом Расеі Бабічам і прэс-сакратаром Міністэрства замежных справаў Беларусі Анатолем Глазам адбылася пасьля інтэрвію расейскага дыплямата агенцтву «РИА Новости».

Завочна адказваючы на заявы Аляксандра Лукашэнкі, Міхаіл Бабіч згадаў, што беларускія партнэры «паставілі пытаньні і аб унутрырасейскіх цэнах на газ, аб кампэнсацыі падатковага манэўру, павелічэньні аб’ёмаў атрыманьня субсыдыяў з расейскага бюджэту для беларускіх прамысловых прадпрыемстваў нароўні з расейскімі...».

Ён таксама адзначыў, што «ня трэба вучыць Расею і яе ўрад, як жыць, пагатоў ахвочых у сьвеце і так хапае».

Анатоль Глаз парэкамэндаваў паслу «больш часу прысьвяціць таму, каб паглыбіцца ў спэцыфіку краіны знаходжаньня, пазнаёміцца зь яе гісторыяй і праявіць крыху павагі».

«Часам такі стыль працы дае значна большы вынік, чым апрабаваньне на сабе зусім нехарактэрнай для сур’ёзнай расейскай дыпляматычнай школы ролі адэпта „публічнай дыпляматыі“. На мой погляд, за кароткі час працы ў Беларусі ён проста не зразумеў розьніцы паміж фэдэральнай акругай і незалежнай дзяржавай. Думаю, у бліжэйшы час нашым партнэрам будуць дадзеныя дэталёвыя адказы на заявы спадара амбасадара», — заявіў Анатоль Глаз.

У адказ Бабіч назваў пазыцыю прэсавага сакратара МЗС Беларусі «балбатнёй».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG