Ахвярамі авіяўдару Расеі па сырыйскай правінцыі Ідліб сталі ня менш за 10 мірных жыхароў. Пра гэта паведамляе Reuters са спасылкай на паўстанцаў, мясцовых жыхароў і ратавальнікаў.
Базаваны ў Лёндане Сырыйскі назіральны цэнтар правоў чалавека падае дадзеныя аб 13 загінулых, у іх ліку 6 дзяцей. Яшчэ каля 60 чалавек былі параненыя, сьцьвярджаюць праваабаронцы. Яны назвалі ўдар самым магутным за апошнія месяцы, адзначыўшы, што расейскія самалёты скідалі бомбы некалькімі этапамі на працягу 24 гадзін.
Удар быў накіраваны супраць рэштак паўстанцкіх сіл. Пры гэтым у выніку бамбаваньняў была разбураная турма на ўскраіне Ідлібу. Дзясяткі зьняволеных уцяклі, піша Reuters.
Расея нанесла ўдар па Ідлібе 13 сакавіка. Міністэрства абароны Расеі заявіла пра зьнішчэньне складу са зброяй адной з экстрэмісцкіх груповак. Інфармацыю пра ахвяры сярод мірнага насельніцтва Масква не камэнтуе. Раней гэткія абвінавачаньні яна адпрэчвала.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў