Амаль 4 гадзіны абмяркоўвалі зьмякчэньне антынаркатычнага заканадаўства прадстаўніцы «Матчынага руху 328» з чыноўнікамі і дэпутатамі Палаты прадстаўнікоў.
На сустрэчы былі прадстаўнікі міністэрстваў юстыцыі, аховы здароўя, адукацыі, унутраных спраў, дэпартамэнту выкананьня пакараньняў, Сьледчага камітэту, Генэральнай пракуратуры, а таксама дэпутаты Палаты прадстаўнікоў. Прадстаўнікоў Вярхоўнага Суду на сустрэчы не было, нягледзячы на «вялікую колькасьць пытаньняў» да ведамства, сказала Свабодзе Ларыса Жыгар з «Матчынага руху 328».
Паводле яе, усе пытаньні прадстаўніц руху запісалі і абяцалі прыняць да ведама.
Навошта зьбіраліся?
Летась Палата прадстаўнікоў у першым чытаньні ўхваліла законапраект, які прадугледжвае зьмякчэньне пакараньняў за наркатычныя злачынствы. Зьмены павінны былі разглядацца ў другім чытаньні на восеньскай сэсіі Палаты, але гэтага не адбылося.
Прадстаўніцам «Матчынага руху 328» паабяцалі паведаміць, калі зьмены ў антынаркатычнае заканадаўства будуць разглядаць у Палаце прадстаўнікоў, сказала Жыгар. Вясновая сэсія Палаты пачнецца 2 красавіка.
Паабяцалі амніставаць непаўналетніх
Чыноўнікі паабяцалі прадстаўніцам руху, што найбліжэйшая амністыя асуджаных закране непаўналетніх і ўпершыню асуджаных за наркатычныя злачынствы, сказала Жыгар. Дэпутаты Палаты прадстаўнікоў адправілі свае прапановы па амністыі ў Вярхоўны суд і МУС.
Міністар унутраных спраў Ігар Шуневіч 12 сакавіка паведаміў, што законапраект аб амністыі падрыхтуюць «у найбліжэйшы час», каб Палата прадстаўнікоў пасьпела яго прыняць да Дня Незалежнасьці 3 ліпеня, пісала БелТА. Шуневіч заявіў, што ў сьпіс амніставаных будзе прапаноўваць уключыць тых, каго асудзілі за наркатычныя злачынствы паводле артыкулу 328.
Нагадаем, што папярэдняя амністыя ў 2015 годзе ня тычылася асуджаных за наркатычныя злачынствы.
На круглым стале закранулі яшчэ шэраг пытаньняў:
- Сытуацыю зь непаўналетнімі асуджанымі;
- Умоўна-датэрміновае вызваленьне і замену неадбытай часткі больш мяккім пакараньнем;
- Рэабілітацыю і рэабілітацыйныя цэнтры для нарказалежных;
- Умовы ўтрыманьня асуджаных у калёніях;
- Правапрымяняльную практыку судоў.
На круглы стол запрасілі ня ўсіх
З грамадзкага боку на сустрэчу запрасілі толькі прадстаўніц «Матчынага руху 328». Улады тройчы забаранілі ўдзельнічаць у круглым стале ініцыятыве «Нашае права», якая абараняе правы вязьняў, сказала Свабодзе прадстаўніца кампаніі Тацяна Канеўская.
«Учора прыйшлі наўпрост у Палату прадстаўнікоў, размаўлялі з Чэканам (дэпутат Палаты Васіль Чэкан. — РС), і нам адмовілі», — сказала Канеўская.
Пакараньне за наркатычныя злачынствы ў Беларусі. Што важна ведаць
- У красавіку-траўні 2018 года актывісткі «Маці 328» правялі 15-дзённую галадоўку ў Калінкавічах на Гомельшчыне і ў Пухавіцкім раёне на Меншчыне, а таксама 10-дзённую галадоўку ў Лідзе.
- Удзельнікі галадоўкі патрабавалі перагляду жорсткіх прысудаў, якія выносіліся ад 2013 году паводле 328 артыкула (ад 5 да 25 гадоў пазбаўленьня волі), а таксама зьменаў у заканадаўства.
- «Маці 328» лічаць, што ў некаторых выпадках тэрміны зьняволеньня несувымерныя злачынству, а закон недастаткова ўлічвае асобы злачынцаў, іх узрост ды іншыя акалічнасьці.
- 13 чэрвеня 2019 года Палата Прадстаўнікоў у другім чытаньні прыняла папраўкі ў артыкул 328. Мінімальны тэрмін пазбаўленьня волі за незаконнае абарачэньне наркотыкаў зьменшылі на 2 гады. У ліпені Лукашэнка падпісаў закон аб зьмене КК.
