Канцэртны хор Санкт-Пецярбургу выканаў на канцэрце 23 лютага ў пецярбургскім Ісакіеўскім саборы песьню Андрэя Казлоўскага «На подводной лодочке, или О зарплате военнослужащих». Канцэрт быў прымеркаваны да Дня абаронцы Айчыны, песьня выконвалася пасьля асноўнай праграмы.
У тэксьце песьні Злучаныя Штаты і ў прыватнасьці Вашынгтон абвяшчаюцца «зямлёй непрыяцеля», якая павінна гарэць.
Расейскае дзяржаўнае ТВ 24 лютага пералічвала вайсковыя аб’екты ў ЗША, пазначаныя як цэлі патэнцыйнага ядзернага ўдару – сьцьвярджалася, што ракета, якая знаходзіцца ў распрацоўцы, даляціць да іх за 5 хвілінаў. Рэпартаж быў зьвязаны з заявай Уладзіміра Пуціна пра тое, што расейскае войска гатовае да крызісу, падобнага да Карыбскага крызісу 1962 году, «калі ЗША захоча такі».
Упершыню ў сучаснай Расеі падобныя заявы гучалі ў 2014 годзе з вуснаў таго ж Дзьмітрыя Кісялёва, які цяпер агучыў цэлі. Тады Кісялёў «нагадваў», што Расея адносіцца да дзяржаваў, якія могуць зрабіць з ЗША «радыяактыўны попел».
