Лінкі ўнівэрсальнага доступу

12 імпрэзаў да Дня роднай мовы, якія варта наведаць


21 лютага ў сьвеце адзначаецца Міжнародны дзень роднай мовы. У Беларусі з гэтай нагоды адбудзецца шэраг імпрэзаў на самых розных пляцоўках — ад навукова-практычных канфэрэнцыяў і лекцыяў да выступаў папулярных музыкаў і літаратараў у кавярнях і крэатыўных прасторах.

1. Тыдзень навуковых дыскусіяў

Інстытут мовазнаўства імя Якуба Коласа ладзіць цэлы тыдзень роднай мовы — шэраг навукова-практычных канфэрэнцыяў, круглых сталоў, лекцыяў.

Падрабязнасьці на сайце Інстытуту мовазнаўства Нацыянальнай акадэміі навук.

2. Прэзэнтацыя ўнікальнага слоўніка

Прэзэнтацыя кнігі Апанаса Ярушэвіча «Расейска-беларускі слоўнік. Архіўная спадчына» аб’ёмам 13 190 рэестравых адзінак.

Унікальнае выданьне падрыхтаванае Інстытутам мовазнаўства сумесна з Нацыянальным архівам Рэспублікі Беларусь. Укладальнік зьбіраў матэрыялы для слоўніка ў 1907–1918 гадах, калі слоўнікаў новай беларускай мовы яшчэ не было або яны толькі рыхтаваліся.

20 лютага, менскі Дом-музэй І зьезду РСДРП, 15.00.

3. Instagram-акцыя

Музэй Якуба Коласа праводзіць Instagram-акцыю «Маё любімае слова на роднай мове».

Да ўдзелу запрошаныя ўсе, для каго родная мова — мілагучная, дзіўная, далікатная, пявучая, арыгінальная і, галоўнае, любімая. Трэба знайсьці беларускае слова, якое выклікае ўсьмешку, зьмясьціць фатаздымак і слова ў сетцы Instagram з хэштэгам #DRM_kolas.

Пераможцаў вызначаць 21 лютага, яны атрымаюць памятныя прызы.

Кампанія «Беларускамоўны»

«Арт-сядзіба», кампанія «Будзьма беларусамі», Саюз беларускіх пісьменьнікаў, ПЭН-цэнтар, тэлеканал Белсат і каталёг Say.by абвясьцілі кампанію «Беларускамоўны».

Кампанія, паводле яе стваральнікаў, мае на мэце дасягнуць рэальнага моўнага раўнапраўя ў Беларусі.

Сёлета імпрэзы ў рамках кампаніі адбудуцца ня толькі ў Менску, але і ў рэгіёнах. Усе імпрэзы, пералічаныя ў сьпісе ніжэй, праходзяць у рамках гэтай кампаніі.

4. Канцэрт і забавы

У менскай кавярні «Грай» пройдуць вялікі канцэрт, конкурсы, забавы.

Удзельнікі: Усевалад Сьцебурака, Наста Кудасава, Марыя Мартысевіч, Стась Карпаў. Музыкі: гурт «Akute», «Uzari», рэпэр ANGST. Для ўсіх гасьцей гульня-шоў «Самшазам» — нешта кшталту «Ўгадай мэлёдыю».

На другім паверсе — настольныя гульні, дзіцячыя забавы, кірмаш сувэнірнай прадукцыі з этнакалярытам.

21 лютага, 18.00, Менск, Інтэрнацыянальная вуліца, 33.

5. Выступ бардаў

У Берасьці, у прасторы «Дзедзіч», пройдзе выступ беларускамоўных бардаў.

Чакаецца літаратурна-музычная замалёўка «Хутка вясна» з удзелам бардаў Алеся Камоцкага і Алесі Сівохінай. Таксама будзе выступаць пісьменьніца Натальля Харытанюк.

21 лютага, 18.00, Берасьце, вуліца Маякоўскага, 46.

6. Баі на мячах

Магілёўскі цэнтар «Кола» падрыхтаваў рыцарскую праграму.

Рэканструктары клюбу «Волат» Юры Ўсьціновіч і Андрэй Дундукоў выступяць з рыцарскай праграмай: выстава дасьпехаў і ўзбраеньня, баі на мячах, цікавыя факты пра адметнасьці бою. Будуць і конкурсы. Госьць — пісьменьнік і журналіст Алесь Кіркевіч.

21 лютага, 18.30, Магілёў, завулак Чкалава, 16.

7. Сольны канцэрт Вайцюшкевіча ў Горадні

Зьміцер Вайцюшкевіч
Зьміцер Вайцюшкевіч

Канцэрт Зьмітра Вайцюшкевіча да Дня роднай мовы, горадзенская прастора «Ў цэнтры».

21 лютага, 19.00, Горадня, вуліца Кірава, 3.

8. Сярэднявечная музыка ў Гомлі

У гомельскім цэнтры беларускай мовы пройдзе сустрэча зь мясцовымі літаратарамі Сяргеем Балахонавым і Юльянай Пятрэнкай, а гурт «Літы талер» выканае сярэднявечную музыку з сучаснымі матывамі.

21 лютага, 18.00, Гомель, Працоўная вуліца, 22.

9. Сольны канцэрт Такінданга ў Віцебску

Андрусь Такінданг
Андрусь Такінданг

У віцебскім арт-пабе «Торвальд» пройдзе творчая вечарына і канцэрт Андруся Такінданга.

22 лютага, 19.00, Віцебск, вуліца Талстога, 1.

10. Сьпеўны сход у Бабруйску

У бабруйскай крэатыўнай прасторы «1387» ладзяць «Сьпеўны сход» са Зьмітром Вайцюшкевічам. Таксама выступяць мясцовыя гурты. Моўныя курсы «Мова нанова Бабруйск» адзначаць сваё 5-годзьдзе.

23 лютага, 18.00, Бабруйск, Чангарская вуліца, 54.

11. Салодкі Дзень роднай мовы ў Магілёве

Таварыства беларускай мовы сумесна з cukerki.by зладзіць у цэнтры Магілёва «Салодкі Дзень роднай мовы». Падчас акцыі валанцёры павіншуюць гараджан са сьвятам, прапануюць ім праверыць веды ў беларускай мове і атрымаць салодкі пачастунак.

21 лютага, 12:00–14:00, Магілёў, плошча Зорак (Ленінская вуліца, 47).

12. Традыцыйная дыктоўка

Таварыства беларускай мовы правядзе 12-ю агульнанацыянальную дыктоўку.

Рада ТБМ прапануе дыктоўку паводле твораў Кастуся Каліноўскага («Адкуль узялася паншчына?» з «Мужыцкай праўды»), Уладзімера Арлова (чатыры фрагмэнты з эсэ «Незалежнасьць — гэта...»), Уладзімера Караткевіча («Беларуская песьня»). А для школаў — верш магілёўскай дзяўчынкі Насьці Мацюлінай «Наказ».

21 лютага, офіс ТБМ (Менск, вуліца Румянцава, 13). Пачатак у 18.00.

21 лютага, горадзенская прастора "Ў цэнтры". (Горадня, вуліца Кірава, 3) Пачатак у 18.00

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG