Лінкі ўнівэрсальнага доступу

«Ён добры хлопец, заўсёды вітаецца». Рэпартаж са Стоўпцаў, дзе падлетак забіў настаўніцу на ўроку гісторыі


«Хуткая» каля школы №2 у Стоўпцах

Навіны пра трагедыю ў школе № 2 жыхары Стоўпцаў даведваюцца з інтэрнэту. Папулярная сярод мясцовых вэрсія прычынаў злачынства — «наглядзеўся тэлевізара».

Напад

Ад школы № 2, дзе раніцай 11 лютага здарылася гучнае злачынства, да дома вучня 10-й клясы Вадзіма М. каля 10 хвілін пешшу. З дома Вадзім выйшаў прыкладна ў 7.30. У 7.40 яго бачылі аднаклясьнікі з заплечнікам.

Вадзім зайшоў у сваю клясу, пакінуў заплечнік за партай і выйшаў на калідор. Назад у клясу ён зайшоў ужо пасьля званка. Адразу падышоў да настаўніцы гісторыі і ўдарыў яе нажом. Са сваіх месцаў абараняць настаўніцу кінуліся два аднаклясьнікі Вадзіма, ён нанёс удары нажом і ім.

Пасьля гэтага выйшаў з клясы і зайшоў у суседнюю, дзе займаліся адзінаццаціклясьнікі. Там Вадзім М. таксама ўдарыў аднаго з вучняў нажом і выйшаў назад у калідор. Пасьля гэтага дзесяціклясьнік выйшаў са школы і пайшоў у адваротны ад свайго дому бок па вуліцы Ленінскай.

Амаль празь дзьве гадзіны пасьля нападу яго заўважылі ў адным з пад’ездаў жыхары трохпавярховіка і выклікалі міліцыю. Затрымлівалі Вадзіма М. з дапамогай АМАПу, у дзесяціклясьніка пры сабе быў нож. Настаўніца і адзінаццаціклясьнік памерлі на месцы ў школе. Два аднаклясьнікі Вадзіма, якіх ён параніў, трапілі ў рэанімацыю. Іхнаму жыцьцю ўжо нічога не пагражае.

«Добры хлопец»

Ля дома на вуліцы Гагарына, дзе жыве сям’я Вадзіма М., прыпаркавана некалькі легкавікоў Сьледчага камітэту. У двары людзі ў форме. Суседзі гавораць, што сьледчыя прыехалі з самай раніцай, з сабой прывезьлі бацькоў нападніка.

«Яны харошыя людзі, ніколі зь імі праблем ніякіх, — расказвае Свабодзе суседка сям’і Вадзіма М. Алена. — Але не мясцовыя, недзе тры гады таму прыехалі сюды, купілі дом гэты, рабілі рамонт. Я не скажу, што сябравала зь імі, але заўсёды віталіся.

Яны ня п’юць, мужчына гэты, кажуць, працавіты. Ён кіроўцам працуе. То на машыне яго бачу, то на трактары. А дзе маці Вадзіма працуе, я не скажу. Яны маладзейшыя за мяне, гадоў па 40. То мы не асабліва цесна знаёмыя».

Алена гаворыць, што суседзкага хлопца памятае яшчэ малым, калі яны толькі пераехалі ў Стоўпцы. Ні яна, ні хто іншы ніколі ня мелі з Вадзімам праблем. Звычайны, ціхі хлопец. У сям’і яшчэ ёсьць дачка, малодшая сястра Вадзіма.

«Нармальны хлопец, як усе, — расказвае Алена. — Заўсёды вітаецца, ніякай бяды ад яго не было. Я не скажу, што часта размаўляла зь ім — пра што мне было гаварыць з хлопцам? Але так нармальны. Калі сёньня сказалі, што гэта здарылася, то я і не паверыла, перапытвала. Але цяпер бачу, што машын многа прыехала, людзі ў форме. То значыць праўда».

Суседка сям’і Вадзіма дадае, што жыве сям’я даволі заможна. Набылі дом, рабілі рамонт, прыбудову. Пра канфлікты ўнутры сям’і ніхто з суседзяў ніколі не гаварыў, хутчэй наадварот.

«Ведаеце, у нас тут па-рознаму бывае, — кажа Алена. — Нехта і выпівае, і сварацца. Дзеці ў каго дагледжаныя, у каго не. Але пра гэтых людзей такога не скажу».

Сьледчыя робяць вобшук у доме нападніка
Сьледчыя робяць вобшук у доме нападніка

«Гэта ўсё інтэрнэт»

Большасьць вучняў 2-й школы адпусьцілі дадому прыкладна праз паўгадзіны пасьля здарэньня. У будынку пакінулі толькі старшаклясьнікаў і тых, хто мог нешта расказаць пра паводзіны Вадзіма М. раніцай.

«Мне дачка пазваніла недзе ў 8.20. Сказала, што настаўніцу забілі і каб я прыйшла ў школу, — гаворыць Марыя, якая разам з бацькамі іншых вучняў стаіць ля школьнага ганка. — Я пакуль прыбегла, тут ужо нікога не пускаюць. Званю, дачка недасяжная. Ім усім загадалі выключыць тэлефоны. Цяпер стаім, чакаем тут, чым усё скончыцца».

Большасьць з бацькоў, якія прыйшлі да школы, ведаюць і Вадзіма М., і яго сям’ю. Паўтараюць словы суседкі — нармальны, звычайны хлопец. У дрэнных кампаніях ня быў заўважны, ня піў, добра вучыўся. Толькі ў апошні час адзнакі сталі горшымі, але нязначна.

«Я думаю, што гэта ўсё інтэрнэт, — гаворыць мужчына, які прыйшоў забіраць сваю дачку, аднаклясьніцу Вадзіма М. — Ён добра вучыўся, навошта было ўсё гэта рабіць? Ніякіх канфліктаў у нашай школе не было, тым больш з настаўнікамі. Я яго сам ведаў. Дзеці цяпер наглядзяцца інтэрнэту. Ну і нагрузка ў іх. Сёньня павінны былі быць тры кантрольныя, гэта як?»

Бацькі каля школы
Бацькі каля школы

«Хірургі нікога не прымаюць увесь дзень, ратуюць хлопцаў»

Яшчэ адна суседка сям’і Вадзіма М., Вольга, пра здарэньне даведалася ў лякарні, куды прыйшла раніцай 11 лютага на прыём.

«Людзі расказалі там, у бальніцы, — гаворыць Вольга. — Хірургі адразу перасталі прымаць, займаліся параненымі, ратавалі хлопцаў. Бегалі па бальніцы. Я амаль нічога ня ведаю, ніякіх падрабязнасьцяў. Гавораць, што гэта хлопец, Вадзім М. усё зрабіў, але навошта? Мы самі цяпер з інтэрнэту пра ўсё даведваемся. Я сям’ю гэтую ведаю — нармальныя, добрыя людзі».

«Сьледчыя дзеяньні працягваюцца»

Пакуль невядома, калі адновяцца заняткі ў 2-й школе. Па словах афіцыйнага прадстаўніка Сьледчага камітэту Сяргея Кабаковіча, які працуе на месцы падзей у Стоўпцах, сьледчыя працягваюць апытваць аднаклясьнікаў Вадзіма М. і настаўнікаў, якія яго вучылі.

Вучняў дапытваюць сьледчыя
Вучняў дапытваюць сьледчыя

Бацькоў дзяцей, зь якімі працуюць сьледчыя, у будынак школы не пускаюць. Туды таксама ня могуць трапіць настаўнікі, якія прыйшлі праводзіць заняткі на другую зьмену. Ад камэнтароў яны адмаўляюцца. Кажуць, што шакаваныя навіной пра сьмерць калегі і аднаго з вучняў. Прычыну злачынства нават прыблізна не называюць. Ні з кім з настаўнікаў, па іх словах, злачынца ніколі сур’ёзна не канфліктаваў. У тым ліку з настаўніцай гісторыі, на якую напаў з нажом раніцай 11 лютага.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG