Лінкі ўнівэрсальнага доступу

Мінэнэрга: «АЭС — гарантыя энэргетычнай бясьпекі Беларусі». Але 100% паліва будзе з Расеі


Беларуская АЭС у Астраўцы (архіўнае фота)

У Міністэрстве энэргетыкі лічаць, што залежнасьць Беларусі ад расейскага газу — гэта пагражальная сытуацыя. А запуск атамнай электрастанцыі — гэта энэргетычная бясьпека краіны.

Пра гэта расказала 14 студзеня ў Астраўцы Лілія Дулінец, намесьніца дырэктара дэпартамэнту ядзернай энэргетыкі Мінэнэрга. Паводле яе, сёньня Беларусь імпартуе звыш 80% энэргарэсурсаў. Галоўным чынам — прыродны газ з Расеі. У генэрацыі электраэнэргіі расейскі прыродны газ займае ўвогуле 95%.

Лілія Дулінец
Лілія Дулінец

«Вядома, сытуацыя, якая склалася, зьяўлялася пагражальнай для энэргетычнай бясьпекі Рэспублікі Беларусь», — сказала Дулінец.

Выхадам з энэргетычнай залежнасьці прадстаўніца Мінэнэрга назвала будаўніцтва АЭС у Астраўцы.

«Разам з будаўніцтвам атамнай станцыі, мадэрнізацыяй нашых генэруючых крыніц — ТЭЦ, ГРЭС — разьвіваецца альтэрнатыўная энэргетыка на аднаўляльных крыніцах. Усё гэта зьяўляецца гарантыяй энэргетычнай бясьпекі Рэспублікі Беларусь», — сказала Дулінец.

У Астраўцы абмяркоўваюць праект Стратэгіі абыходжаньня з адпрацаваным ядзерным палівам
У Астраўцы абмяркоўваюць праект Стратэгіі абыходжаньня з адпрацаваным ядзерным палівам

Нагадаем, атамную электрастанцыю будуе расейская кампанія «Росатом». На будаўніцтва атрыманы расейскі крэдыт. Аляксандар Парфёнаў, намесьнік галоўнага інжынэра Беларускай АЭС, нагадаў, што і паліва для АЭС будзе выкарыстоўвацца выключна расейскае.

«Міжурадавым пагадненьнем, генэральным кантрактам прадугледжваецца пастаўка сьвежага паліва з Расейскай Фэдэрацыі. Ядзерная ўстаноўка расейскага дызайну — і паліва расейскага дызайну», — сказаў Парфёнаў.

Аляксандар Парфёнаў
Аляксандар Парфёнаў

15 студзеня ў Астраўцы абмяркоўвалі праект Стратэгіі абыходжаньня з адпрацаваным ядзерным палівам. Папярэдне выбралі варыянт перапрацоўкі адпрацаванага ядзернага паліва ў Расеі з наступным вяртаньнем у Беларусь. Эколягі назвалі гэты праект самі дарагім і небясьпечным.

Паводле апошняй інфармацыі, Беларусь атрымала ад Расеі крэдыт у памеры каля 10 мільярдаў даляраў. Паводле Міхаіла Міхадзюка, намесьніка міністра энэргетыкі, Беларусь будзе вяртаць крэдыт да 2035 году. Пра гэта ён казаў летась літоўскай тэлекампаніі LRT.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG