Міністар інфармацыі Беларусі Аляксандар Карлюкевіч ў эфіры тэлеканала АНТ расказаў, якім чынам будуць ідэнтыфікаваць карыстальнікаў, якія пакідаюць камэнтары ў інтэрнэце.
«Нехта захацеў зрабіць той ці іншы камэнтар. Ён адпраўляе сваё пасланьне на той ці іншы інтэрнэт-рэсурс і пакідае нумар тэлефона. Туды яму прыйдзе код», — патлумачыў Карлюкевіч парадак ідэнтафікацыі карыстальнікаў праз тэлефонныя нумары.
Нумар тэлефона будзе відаць толькі адміністратарам рэсурсу, але ўладальнікі сайтаў павінныя будуць даваць інфармацыю сілавікам на запыт, дадаў Карлюкевіч.
Зьмены ў закон «Аб СМІ» набудуць моц зь 1 сьнежня.
У верасьні быў апублікаваны праект Палажэньня аб парадку папярэдняй ідэнтыфікацыі карыстальнікаў інтэрнэт-рэсурсаў, дзе даваліся тлумачэньні, як чытачы сайтаў змогуць пакідаць камэнтары ў інтэрнэце.
Адзіны спосаб ідэнтыфікацыі карыстальнікаў на сайтах, указаны ў дакумэнце, — праз абанэнцкія нумары. Такім чынам, зарэгістравацца праз сацыяльныя сеткі ці электронную пошту будзе нельга.
Уласьнікі інтэрнэт-рэсурсаў змогуць зьбіраць наступныя пэрсанальныя дадзеныя карыстальнікаў:
- імя і прозьвішча,
- пол, дату і месца нараджэньня,
- адрас электроннай пошты,
- дата і час разьмяшчэньня паведамленьняў/камэнтароў на сайце,
- МАС-адрас прылады,
- IP-адрас.
Што варта ведаць пра папраўкі ў закон аб СМІ
Палата прадстаўнiкоў 14 чэрвеня прыняла ў другім чытаньні папраўкі ў закон аб сродках масавай інфармацыі. Зьмены набудуць моц з 1 сьнежня.
Дакумэнт утрымлівае шэраг новаўвядзеньняў, у прыватнасьці:
- пашырэньне пераліку інфармацыі, распаўсюджваньне якой забаронена;
- абавязковая ідэнтыфікацыя інтэрнэт-карыстальнікаў;
- абмежаваньне ўдзелу іншаземцаў у беларускай інфапрасторы.
Каго будуць блякаваць і штрафаваць. Мінінфарм патлумачыў абноўлены закон аб СМІ
Кіраўнікі незалежных інтэрнэт-рэсурсаў заяўлялі, што падрыхтаваныя папраўкі ў закон «Аб СМІ» сьведчаць пра жаданьне дзяржавы ўсталяваць больш жорсткі кантроль над мэдыясфэрай.
Прадстаўнікоў мэдыясупольнасьці запрасілі на дапрацоўку зьменаў у закон аб СМІ, але на канчатковы варыянт законапраекту гэта не паўплывала.
Большасьць прапаноў, якія ўносілі праваабаронцы, у законе не былі зафіксаваныя.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў