Лінкі ўнівэрсальнага доступу

Біл Гейтс спыніў дапамогу фонду савудаўскага прынца пасьля забойства Хашокджы


Біл Гейтс на сустрэчы з савудаўскім прынцам Мухамэдам бэн Сальманам.
Біл Гейтс на сустрэчы з савудаўскім прынцам Мухамэдам бэн Сальманам.

Фонд амэрыканскага мільярдэра Біла Гейтса перапыніў супрацоўніцтва з савудаўскай дабрачыннай арганізацыяй насьледнага прынца Мухамэда бэн Сальмана ў сувязі з забойствам журналіста Джамаля Хашокджы.

Гейтс плянаваў ахвяраваць на адну з дабрачынных ініцыятыў савудаўскага фонду 5 мільёнаў даляраў. Ініцыятыва была накіраваная на разьвіцьцё інавацый у сфэры адукацыі. Гейтс адзначыў, што сочыць за ходам расьсьледаваньня забойства Хашокджы і вельмі занепакоены гэтай сытуацыяй.

Джамал Хашокджы зайшоў на тэрыторыю савудаўскага кансуляту ў Стамбуле 2 кастрычніка і ня выйшаў назад. Праз тры тыдні савудаўскія ўлады прызналі, што ён загінуў.

Паводле першапачатковай вэрсіі, Хашокджы памёр у выпадковай бойцы з супрацоўнікамі кансуляту. Пасьля пракурор краіны заявіў, што забойства было наўмысным. Савудаўскае кіраўніцтва абвясьціла пра арышт 18 падазраваных, але адхіліла ўласнае дачыненьне да арганізацыі забойства.

Краіны Захаду ня лічаць Савудаўскую вэрсію дакладнай i падазраюць, што заказчыкі забойства Хашокджы могуць быць зьвязаныя з каралеўскай сям’ёй. У сувязі з гэтым заходнія лідэры дапусьцілі ўвядзеньне санкцый супраць Эр-Рыяду.

Прэзыдэнт Турэччыны Рэджэп Эрдаган са спасылкай на дадзеныя сьледзтва назваў забойства Хашокджы наўмысным і загадзя сплянаваным.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG