Лінкі ўнівэрсальнага доступу

Дзяржсакратар ЗША заявіў, што «велізарны» ядзерны патэнцыял Расеі ўяўляе пагрозу для ўсяго сьвету


Дзяржсакратар ЗША Майк Пампэо

Дзяржсакратар ЗША Майк Пампэо заявіў, што ЗША спрабуюць адначасова «даваць адпор» дзейнасьці і Расеі, і Кітаю, адзначыўшы, што «велізарны» ядзерны арсэнал Расеі стварае пагрозу ня толькі для ЗША, але і для ўсяго сьвету, паведамляе «Голас Амэрыкі».

Пампэо, параўноўваючы пагрозы з боку Расеі і Кітая ў радыёінтэрвію ў чацьвер, адзначыў: «У Расеі значна меншая эканоміка, але велізарны ядзерны патэнцыял, які пагражае ня толькі ЗША, але і ўсяму сьвету».

Ён дадаў, што прэзыдэнт Дональд Трамп вядзе вельмі жорсткую палітыку ў дачыненьні Расеі і прымае такія захады для аказаньня ціску на прэзыдэнта Уладзіміра Пуціна і Расею, як ніводная зь мінулых адміністрацый.

«Аднак мы таксама спрабуем знайсьці галіны, дзе ў нас ёсьць агульныя інтарэсы з Расеяй і Ўладзімірам Пуціным, — заявіў Пампэо. — Я рабіў гэта, калі быў дырэктарам ЦРУ, у сфэры барацьбы з тэрарызмам. Мы спрабуем рабіць гэта ў розных галінах, каб у нас былі стасункі, што, як мы спадзяёмся, дало б нам магчымасьць зьмяніць прыроду паводзінаў Расеі, каб яна спыніла тую дзейнасьць, якая выклікае заклапочанасьць: умяшаньне ў нашы выбары ці спробы ўмяшаньня; дзеяньні ва Ўкраіне».

«Мы спрабуем даваць адпор гэтай дзейнасьці і паказаць Расеі, што выгада ад гэтай дзейнасьці не пераважвае велізарных наступстваў, зь якімі яна сутыкнецца, калі будзе яе працягваць», — дадаў дзяржсакратар.

Кітай жа ён назваў доўгатэрміновым выклікам «па ўсіх франтах».

Паводле Пампэо, прэзыдэнт Трамп хоча дамагчыся ад Кітаю сумленнага і ўзаемавыгаднага гандлю, і ён цьвёрда мае намер дасягнуць гэтай мэты.

Пампэо таксама са шкадаваньнем адзначыў, што Кітай працягвае ваенную актыўнасьць у Паўднёва-Кітайскім моры, а таксама крадзяжы інтэлектуальнай уласнасьці: толькі на гэтым тыдні дзесяці кітайскім грамадзянам былі прад’яўленыя абвінавачваньні ў крадзяжах, зьвязаных з авіяцыяй.

«Гэта ня тая дзейнасьць, якой займаюцца краіны, якія сапраўды імкнуцца быць часткай сусьветнай супольнасьці, — падкрэсьліў дзяржсакратар. — І мы даём адпор Кітаю па ўсіх гэтых франтах, каб дасягнуць гэтай мэты ў імя амэрыканскага народу».

Адказваючы на пытаньне аб пэрспэктывах Турэччыны як чальца NATO і пра тое, ці можа наступіць момант, калі будучыня яе як чальца NATO і саюзьніка апынецца пад пытаньнем, Пампэо сказаў: «Спадзяюся, што не. Было б сумна для NATO, для ЗША і яшчэ больш сумна для грамадзян Турэччыны, калі б такое сапраўды здарылася».

Пры гэтым стасункі з Турэччынай ён апісвае як «няпростыя».

«Мы спадзяёмся, што Турэччына і прэзыдэнт Эрдаган з часам зразумеюць, што ЗША — больш надзейны партнэр, чым Іран, і прэзыдэнту Эрдагану варта рухацца ў кірунку разьвіцьця стасункаў з ЗША, Эўропай і NATO, — сказаў Пампэо. — А калі нам гэта ўдасца, Турэччына зможа стаць бастыёнам, які будзе засьцерагаць Амэрыку ад пагроз з боку тэрарыстаў у гэтым рэгіёне».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG