Лінкі ўнівэрсальнага доступу

Дзеці ня хочуць, бацькі патрабуюць. Настаўнікі — могуць? Выкладчыкі-энтузіясты дзяліліся досьведам у Менску


На гэтых выходных у Менску прайшла другая сустрэча школьных настаўнікаў EdCamp Belarus — 2018.

Каля 150 настаўнікаў дзяліліся сваімі напрацоўкамі, мэтодыкамі, ідэямі і досьведам.

З дапамогай намесьніцы старшыні Таварыства беларускай школы Тамары Мацкевіч разьбіраемся ў адметнасьцях сёлетняга «кірмашу ідэяў».

Тамара Мацкевіч
Тамара Мацкевіч
  • Дзеці і бацькі патрабуюць сучасных падыходаў да адукацыі. А сыстэма адукацыі не зьмянялася з савецкіх часоў. Аднак ёсьць настаўнікі, якія хочуць быць сучаснымі прафэсіяналамі, а не трансьляваць тое, што ім кажа Міністэрства адукацыі. І ім ёсьць што абмеркаваць.
  • У кожнага з удзельнікаў EdCamp было 90 сэкундаў, каб прэзэнтаваць сваю ідэю.
  • 50 заявак, 32 абмеркаваньні ідэяў, 12 майстар-клясаў на чатырох пляцоўках (іх запісы можна будзе паглядзець онлайн на сайце nastaunik.info)

«Дастаткова паклікаць аднаго, як ён прыводзіць вялікую колькасьць такіх самых — крэатыўных, зацікаўленых, у каго гараць вочы. То бок, ёсьць каманда, якая ўвесь час папаўняецца», — кажа Тамара Мацкевіч пра «рэформу адукацыі зьнізу».

Усе праекты, прэзэнтаваныя на EdCamp, адпавядалі чатыром крытэрам.

  1. Камунікацыя, навыкі
  2. Крэатыўнасьць, творчасьць
  3. Камандная праца, уменьне працаваць у камандзе
  4. Крытычнае мысьленьне

Першы EdCamp быў арганізаваны за сродкі аднаго бізнэсоўца — сузаснавальніка Maps.me Юрыя Мельнічака, а таксама падтрыманы ў рамках конкурсу сацыяльных праектаў Social Weekend. Сёлета арганізатары EdCamp 2018 у Беларусі — Global Shapers Minsk Hub i Таварыства беларускай школы пры падтрымцы Imaguru: Бізнэс-Клюб / Startup Hub, Social Weekend — Конкурс сацыяльных праектаў. Партнэрамі форуму сталі Амбасада Нідэрляндаў, партал Nastaunik.info, кампаніі «Кока-Кола Бэўрыджыс Беларусь» і «Актывія», арганізацыі PACT і USAID. Пляцоўку ж даў бізнэс-клюб «Імагуру».

«Дзякуй богу, наш бізнэс прачынаецца і пачынае разумець, што недастаткова інвэставаць толькі ў сябе, трэба інвэставаць у дабрабыт грамадзтва. Бо ня будзеш шчасьлівым сярод няшчасных людзей, ня будзеш багатым сярод бедных...

І тут адукацыя працуе як сацыяльны ліфт: каб разумныя людзі праз адукацыю маглі дасягнуць большага», — зазначае Тамара Мацкевіч.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG