9 чэрвеня грамадзкія актывісты працягнулі пікетаваньне рэстарацыі «Поедем поедим», якая знаходзіцца на 51 кілямэтры кальцавой дарогі за 50 мэтраў ад Курапатаў.
Ці нешта зьмянілася ў суботу, калі апоўдні пікетаваньне аднавілася?
Наведнікаў цягам дня было гэтак жа мала, а вось лік інцыдэнтаў адкрыўся хутка. А палове на першую тры байкеры ў чорных шлемах, на дарагіх матацыклах, у тым ліку BMW, амаль не зьніжаючы хуткасьці паспрабавалі прарвацца празь пікет за браму рэстарацыі «Поедем поедим».
У адказ на словы пікетоўцаў, што тут ахоўная зона, байкеры толькі націскалі на газ. Двум ўдалося праехаць праз натоўп, але трэцяга пікетоўцы ўсё ж спынілі.
Кіроўца Аляксандр не назваў свайго прозьвішча і адразу выклікаў міліцыю. Пікетоўцаў ён прасіў не чапаць ягоны «дарагі матацыкл», а пра сябе сказаў, што ён «не багаты чалавек, а нармальны». Пры гэтым адмовіўся зьняць шлем.
Дыскусія працягвалася пакуль не зьявіўся нарад ДАІ, але высьветлілася, што пратакол міліцыянты мусілі б складаць на байкера, які наехаў на нагу пікетоўцу Аляксею Туровічу.
«Ну, калі ўжо міліцыя нічога ня можа зрабіць, тады вы перамаглі, мы вяртаемся», — сказаў Аляксандр, і ўся кампанія пакінула тэрыторыю рэстарана. Перад ад’ездам Аляксандр зноў перавязаў стырно байка георгіеўскай стужкай, якую былі зьнялі пікетоўцы.
Пікетоўцы са стажам і навічкі
Сёньня ў пікеце каля рэстарацыі бралі ўдзел больш за 20 актывістаў, у тым ліку апазыцыйныя палітыкі — сустаршыня БХД Павал Севярынец, актывіст руху «Разам» Вячаслаў Сіўчык, намесьнік старшыні Беларускай партыі зялёных Дзьмітрый Кучук, мастак Аляксей Марачкін, вэтэран дэмакратычнага руху і актывіст АГП Уладзімер Раманоўскі ды іншыя.
Але былі і людзі, якія прыйшлі на акцыю ў Курапатах упершыню.
«Далучылася, бо баліць сэрца з прычыны такой несправядлівасьці. Паўсюль усё вырашаюць грошы, а гэтак ня мусіць быць, памяць трэба берагчы», — патлумачыла свой удзел ў пікеце Валянціна. У Барысаве жанчына змагаецца за бацькоўскі дом, прайшла ўжо некалькі судоў. Кажа: «Улада паўсюль аднолькавая».
Малады чалавек Мікіта прыехаў з Лагойску. Калі дабраўся да Курапатаў, накінуў на плечы бел-чырвона-белы сьцяг і стаў у шэраг пікетоўцаў. Таксама мае асабістую праблему — дамагаецца адмены несправядлівага, як ён лічыць, рашэньня аб канфіскацыі ягонай і ягонай сястры маёмасьці. Кажа, што на 20 тысяч рублёў забралі рэчаў, яшчэ і грошы. Хутка суд. Сёньня ахвяруе час на агульную справу. «Але буду і далей прыяжджаць».
Побач зь Мікітам два юнака — Павел і Пётра. Пытаюся, адкуль даведаліся пра акцыю ў Курапатах? Петар — з інтэрнэту, Павел — ад дзядулі, які паведаміў унуку, што ягоны прадзед ляжыць у Курапатах, быў расстраляны як вораг народу. Але кім працаваў прадзед і ці рэабілітаваны пасьмяротна, Павел ня ведае. «Сёньня абавязкова спытаю у дзеда».
Палітыкі дамовіліся пра расклад дзяжурстваў у Курапатах
Павал Севярынец паведаміў Свабодзе, што шэраг партый і грамадзкіх рухаў дамовіліся паміж сабой аб арганізацыі дзяжурстваў у пэўныя дні тыдня каля рэстарацыі ў Курапатах.
«Альтэрнатыва», якой кіруе Алег Корбан, хутчэй за ўсё возьмецца дзяжурыць у панядзелак, далей — Рух салідарнасьці «Разам», наша «БХД» — у сераду, таксама далучаюцца партыя БНФ, Малады фронт, Эўрапейская Беларусь. КХП БНФ мусіць канчаткова вызначыцца на сойме, але папярэдняя згода ёсьць. Магчыма, яны закрыюць нядзелю. Спадзяюся, з дапамогай аднадумцаў удасца падтрымаць пікетоўцаў, якія змагаюцца тут ужо тыдзень і рэальна стаміліся", — сказаў Павал Севярынец.
Пікетаваньне рэстарацыі, якую актывісты празвалі «кабаком на костках», вядзецца з 31 траўня. За гэты час пікетоўцы не прапусьцілі на тэрыторыю рэстарацыі каля ста грузавікоў з прадуктамі і аўтамабіляў наведнікаў, за што ўжо атрымалі больш за 20 пратаколаў аб парушэньні правілаў дарожнага руху і парадку правядзеньня вулічных акцый.
Нягледзячы на пікеты, рэстарацыя ўсё ж адкрылася і зь вечара 5 чэрвеня прымае наведнікаў. «Але іх вельмі мала, гэтак рэстаран дойдзе да банкруцтва», — меркавалі пікетоўцы ў пятніцу.
Што важна ведаць: пратэсты супраць новай рэстарацыі ў Курапатах
- Рэстаран «Поедем поедим» у Курапатах меркавана запрацаваў увечары 5 чэрвеня.
- Грамадзкія актывісты штодня ад 31 траўня пікетуюць забаўляльны комплекс, патрабуючы закрыцьця рэстарацыі.
- 1 чэрвеня рэстаран «Поедем поедим» пачаў рэклямавацца ў інтэрнэце.
- 28 траўня карэспандэнт Свабоды трапіў на тэрыторыю комплексу, дзе пабачыў падрыхтоўку да хуткага адкрыцьця рэстарацыі.
- Адрас рэстарацыі супадае з адрасам ТАА «Амізбел», якое было створана кампаніяй «Белноватэкс груп». Апошняя валодае шэрагам фэшэнэбэльных рэстаранаў у Менску.
- Рэстарацыя стаіць за 50 мэтраў ад месца, дзе ў 1930-я адбываліся масавыя расстрэлы. Карнікі НКВД расстралялі тут ад 30 тысяч да 250 тысяч чалавек.
- Будоўля забаўляльнага комплексу пад назвай «Бульбаш-хол» пачалася ў 2010 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.
- Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.
Сталінскія рэпрэсіі і Курапаты
У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што пад іх падпалі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладныя лічбы не вядомыя — КДБ дагэтуль не раскрыў архівы. Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 гады ў Курапатах — лясным масіве пад Менскам.
