Лінкі ўнівэрсальнага доступу

Эўразьвяз: сьмяротнае пакараньне супярэчыць гатоўнасьці Беларусі да супрацы


Эўрапейскі Зьвяз заклікаў Беларусь увесьці мараторый на сьмяротнае пакараньне. Пра гэта гаворыцца ў заяве прэс-сакратара Эўрапейскай службы вонкавых дзеяньняў з нагоды выкананьня двух сьмяротных прысудаў і адмовы ў апэляцыі яшчэ двум сьмяротнікам.

Што важна ведаць

  • Пра сьмяротнае пакараньне Віктара Лётава і Аляксея Міхалені стала вядома 29 траўня падчас разгляду ў Вярхоўным судзе апэляцыі Аляксандра Жыльнікава і Вячаслава Сухаркі, якім прысудзілі вышэйшую меру пакараньня за забойства трох чалавек.
  • 30-гадовы Віктар Лётаў быў асуджаны да сьмяротнага пакараньня за трэцяе забойства, якое ўчыніў у Глыбоцкай турме, дзе ўжо адбываў пакараньне за забойства.
  • 32-гадовы Аляксей Міхаленя — неаднаразова судзімы жыхар Нароўлі, які ў сакавіку 2016 году забіў суседзяў-пэнсіянэраў.
  • 29 траўня Рада Эўропы заклікала Беларусь увесьці мараторый на сьмяротнае пакараньне. Эўразьвяз пэрыядычна заклікае Беларусь адмовіцца ад сьмяротнага пакараньня.
  • 30 траўня Вярхоўны суд адхіліў апэляцыю Аляксандра Жыльнікава і Вячаслава Сухаркі, асуджаных на сьмерць.
  • Усяго за гады незалежнасьці ў Беларусі вынесьлі больш за 300 сьмяротных прысудаў.
Асуджаны на сьмяротнае пакараньне Вячаслаў Сухарка пасьля адмовы ў апэляцыі
Асуджаны на сьмяротнае пакараньне Вячаслаў Сухарка пасьля адмовы ў апэляцыі

Эўрапейская служба зьнешніх дзеяньняў заклікала Беларусь увесьці мараторый на сьмяротнае пакараньне. Сьцьвярджаецца, што выкананьне сьмяротных прысудаў супярэчыць гатоўнасьці Беларусі да ўзаемадзеяньня зь міжнароднай супольнасьцю і Эўразьвязам.

Паводле заявы, Эўразьвяз выступае супраць сьмяротнага пакараньня, таму што яно:

  • парушае права на жыцьцё, замацаванае ва Ўсеагульнай дэклярацыі правоў чалавека;
  • «зьяўляецца жорсткім, бесчалавечным і зьневажаючым годнасьць пакараньнем»;
  • ня стрымлівае злачынства;
  • памылковы прысуд ня можа быць выпраўлены.

300 сьмяротных выракаў за часы незалежнасьці. 10 фактаў пра сьмяротнае пакараньне ў Беларусі

Беларусь застаецца апошняй краінай Эўропы, дзе караюць сьмерцю. Усяго за гады незалежнасьці ў Беларусі вынесьлі больш за 300 сьмяротных прысудаў. Эўразьвяз пэрыядычна заклікае Беларусь адмовіцца ад сьмяротнага пакараньня. Нядаўна дэпутат Палаты прадстаўнікоў, старшыня Пастаяннай камісіі па правах чалавека, нацыянальных адносінах і СМІ Андрэй Навумовіч заявіў, што «Беларусь павольна і дакладна ідзе да адмены сьмяротнага пакараньня» і ён «не выключае паўторнага рэфэрэндуму ў гэтым пытаньні».

Улады Беларусі традыцыйна не паведамляюць пра выкананьне сьмяротных прысудаў. Пра гэта ўдаецца даведацца з паказаньняў іншых сьмяротнікаў або ад праваабаронцаў, якія кантактуюць з роднымі асуджаных.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG