Яўген Прэйгерман, кіраўнік экспэртнай ініцыятывы «Менскі дыялёг», разьвітваючыся 25 траўня з удзельнікамі аднайменнага форуму, сказаў, што зноў сустрэнецца з экспэртамі не пазьней чым праз год. «Такія форумы стануць традыцыйнымі», — заявіў ён.
У размове са Свабодай спадар Прэйгерман сказаў, што экспэрты зрабілі велізарную працу.
«Але ўжо сёньня зразумела: каб рухацца далей, патрэбна сталая каманда аналітыкаў і арганізатараў. Над гэтым і будзем працаваць, — сказаў ён. — Я вельмі ўдзячны афіцыйным партнэрам «Менскага дыялёгу». Аднак сьпіс іх будзем пашыраць. Да нас ужо паступілі новыя прапановы ахвотных далучыцца да супрацы».
Намесьнік міністра замежных спраў: форум атрымаўся
Намесьнік міністра замежных спраў Беларусі Алег Краўчанка ўсе тры дні працы «Менскага дыялёгу» знаходзіўся ў залі пасяджэньняў. На пытаньне Свабоды, ці ня страціў ён тут марна час, спадар Краўчанка адказаў: «Ні ў якім выпадку».
«Форум быў надзвычай карысны і пасьпяховы, — сказаў ён. — Я чуў, што некаторыя параўноўвалі яго зь мінулагодняй сэсіяй Парлямэнцкай асамблеі АБСЭ ў Менску. Я б так не рабіў: усё ж гэта розныя фарматы. Там — палітыкі, тут — аналітыкі. Здаецца, яшчэ ніколі ў Менску не зьбіралася столькі экспэртаў. У „Менскага дыялёгу“ раней былі іншыя мерапрыемствы, але ўсе яны нібы рыхтавалі гэты вялікі форум. Безумоўна, у яго будзе далейшы працяг».
У міжнародным форуме, які праходзіў у Менску 23–25 траўня, бралі ўдзел дзясяткі экспэртаў з краін Эўразьвязу, Усходняй Эўропы, Расеі, Кітаю, Злучаных Штатаў.
