Лінкі ўнівэрсальнага доступу

Чатыры тэзы ток-шоў на дзяржаўным тэлеканале пра Беларускую Народную Рэспубліку


Тэлеканал АНТ у эфіры 19 сакавіка паказаў ток-шоў «БНР. Спроба № 1», прысьвечанае стагодзьдзю Беларускай Народнай Рэспублікі.

У перадачы бралі ўдзел гісторык Алег Трусаў, старшыня Партыі БНФ Рыгор Кастусёў, дэпутат Палаты прадстаўнікоў Ігар Марзалюк, дырэктар Інстытуту гісторыі Вячаслаў Даніловіч, палітык Алег Гайдукевіч, палітолягі Аляксей Дзермант і Пётра Пятроўскі.

Вядоўца Дзьмітры Бачкоў на пачатку перадачы падзяліў удзельнікаў спрэчак пра БНР на тры лягеры: першыя сьцьвярджаюць, што трэба шырока сьвяткаваць стагодзьдзе БНР, другія лічаць пунктам адліку дзяржаўнасьці не БНР, а БССР, а трэція не разумеюць, чаму «пэўныя палітычныя сілы» прыватызуюць гісторыю БНР.

Ігар Марзалюк і Алег Гайдукевіч заявілі падчас перадачы, што належаць менавіта да трэцяй групы.

«​Дзяржава прапанавала адсьвяткаваць 100 год БНР»​

Намесьнік старшыні ЛДПБ Алег Гайдукевіч сьцьвярджаў, што 25 сакавіка ніколі ня стане днём, які аб’яднае нацыю, бо апазыцыйныя дзеячы «прыватызавалі» гісторыю БНР і асацыююць Дзень Волі з пратэстам.

«20 гадоў пэўныя дзеячы нас вучылі, што гэта дзень пратэсту... 25 сакавіка ніколі ня стане датай, якая аб’яднае нацыю. Менавіта таму на рэфэрэндуме 1996 году абралі Днём Незалежнасьці 3 ліпеня. Ня знойдзецца чалавека, які скажа, што 3 ліпеня — ня Дзень Незалежнасьці Беларусі. Вы 24 гады хадзілі і пратэставалі. Гэта ўлада ў гэтым годзе прапанавала зладзіць 25 сакавіка мітынг і канцэрт», – казаў Гайдукевіч.

Інфармацыя пра ідэю адзначыць Дзень Волі сьвяточным канцэртам зьявілася 31 студзеня. Аргкамітэт сьвяткаваньня 100 год БНР быў падзелены на дзьве часткі: прыхільнікі Паўла Белавуса выступалі за сьвяточны канцэрт, прыхільнікі Мікалая Статкевіча — за традыцыйнае шэсьце.

26 лютага Менгарвыканкам неафіцыйна прапанаваў арганізатарам сьвяткаваньня зьмяніць яго фармат: замест шэсьця праз цэнтар гораду правесьці мітынг і сьвяточны канцэрт у Купалаўскім парку або каля Опэрнага тэатру.

У выніку 28 лютага сябры аргкамітэту падалі заяўку на правядзеньне канцэрту каля Опэрнага тэатру, якую Менгарвыканкам ухваліў 2 сакавіка. Заяўку на правядзеньне шэсьця ад плошчы Якуба Коласа да Опэрнага тэатру Менгарвыканкам адхіліў.

«​БНР — гэта не нямецкі праект»​

Дэпутат Палаты прадстаўнікоў Ігар Марзалюк заявіў, што БНР — гэта беларускі палітычны праект, які ня стаў дзяржавай.

«Гэта не нямецкі праект. Гэта праект тых, хто быў абураны разгонам Усебеларускага зьезду. Украінцы ўвялі свае войскі і вялі гвалтоўную ўкраінізацыю. Украіна не прызнала БНР», — заявіў Марзалюк.

Паводле Энцыкляпэдыі гісторыі Беларусі, урад Украіны прызнаў БНР. У чэрвені 1918 году дэлегацыя БНР на чале з Раманам Скірмунтам наведала Кіеў. Консульствы БНР былі адкрытыя ў Кіеве і Адэсе.

«Без БНР не было б БССР і сучаснай Беларусі»

Старшыня Партыі БНФ Рыгор Кастусёў сьцьвярджаў, што БНР адрозьніваецца ад БССР спосабам свайго ўтварэньня.

«Беларуская Народная Рэспубліка была створана па волі беларускага народу праз удзел дэлегатаў з тэрыторый, дзе пражывалі беларусы. Беларуская Савецкая Сацыялістычная Рэспубліка была створана па ўказцы Крамля», — сказаў Кастусёў.

Абедзьве дзяржавы, на думку Кастусёва, — часткі гісторыі, аднак без БНР гісторыя БССР і сучаснай Беларусі была б немагчымая.

«БНР не была дзяржавай»

Гісторыю БНР неабходна разглядаць у кантэксьце беларускай дзяржаўнасьці, казаў дырэктар Інстытуту гісторыі Акадэміі навук Вячаслаў Даніловіч.

«Мы разглядаем дзяржаўнасьць як унутраны патэнцыял народу, які назапашваецца тысячагодзьдзямі», — сказаў Даніловіч.

Хоць рэальнай дзяржавай БНР ня стала, аднак упершыню быў рэалізаваны патэнцыял дзяржаўнасьці беларускага народу, лічыць гісторык.

Савецкая дзяржаўнасьць утварылася на гэтым жа падмурку, кіраўніцтва бальшавікоў Расеі — Ленін, Сталін і Троцкі — ня мела да гэтага дачыненьня, сказаў Даніловіч.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG